Oté

Oplis i atann, oplis lé shoz i agrav !

Justin / 4 novembre 2013

Mésyé Chérèque la fé son tour shé nou somèn dèrnyèr. Mi pans son voiyaz té i doi zèt kèkshoz inportan pou nou. Pou kosa ? Pars nana kan mèm in bonpé d’moun mizèr La Rényon, é si mi tronp pa, François Hollande l’avé promèt diminyé la mizèr par dé, pou la Frans la-bà é pou nou galman mi sipoz... Mi pans demoun té in pé dési par son voiyaz, pars la pa fé in bonpé bon zanons, épi la politik gouvèrnman, ni suiv konm lé dsi l’fé, lé riskab pa toush o bi d’si la késtyonn diminyé la mizèr.

Biensir, la mizèr i diminyé pa konm sa, i diminyé pa sa avèk bann diskour, avèk la krash, konm i di. Dan la shart l’Ermitaj, nana in bonpé mézir, é sanm pou moin, si i pran bann mézir-là, i pouré èt in bon komansman. Lé vré, mésyé Chèrèque la di sa i intérès ali, konm bann mézir nout parti i domann pou pran i intérès ali. Kosa li va fé sanm sa ? Mi koné pa. Pars bann désizyon gouvèrnman i kol pa avèk sak ni domann pou pran. Ziska zordi, d’apré sak mi oi, la politik gouvèrnman pou vanj kont la mizèr sé, konm ki diré, in kotèr d’si in zanm de boi.

L’èr-là, zot i pé poz amoin in késtyon : na poin aryen pou fèr, sansa nana dé shoz a fèr ? Si na poin aryen pou fèr, la pa bézoin ni kas tro not tèt… lès alé, lès filé ziska k’in zour i ésploz, ou sinonsa kontinyé èk bann ti mézir mèm si ni koné i fo pa aspèr in bon rézilta èk sa. Si nana dé shoz a fèr, i fo fèr, é sirtou pa tro atann, pars oplis i atann, oplis lé shoz i agrav... oplis sar difisil pou trouv la solisyon.

Justin


Kanalreunion.com