Oté

Oplis i shanj, oplis lé parèy ? Bouz in pé, gouvèrnman !

Justin / 27 zwin 2012

Sarkozy la déside demoun té i doi pran zot rotrète soisann-dé z’ané. In bonpé la pans, si la gosh i gingn z’éléksyon, va artourn dsi la rotrète soisant-an. Zot l’avé poin tor, mé la di azot, sa lé vré si la pèrsone nana son karann-dé z’ané kotizé. Donk, sa va pas dsou l’né in bonpé d’moun… aryink in pti trépé va gagné ! In sanzman ? In pti gine sanzman, sanm pou moin.
Dann in n’ané, la droite la siprime san karann-sis post amontrèr. Tro inzis ! Si la gosh i gingn, nou va oir sak nou va oir. Moi d’séktanm, i sa fé in ratrapaz : kinz post pou nou. Sa i fé trépé sa. In sanzman sa ? Oui, in pti gigine.
Moin la antann dir galman i sava done in kou d’pous lo SMIC ; moin na in dalon i pans li té i sar gingn in bon moné... solman avèk la goumantasyon, boudikont, li sar gingn 21 éro, an plis par moi. Sa i pèz pa lour, sa. In sanzman sa ? In pti zing sanzman.
Bin alor, o moin, mon bann kamarad i sar gingn in takon pti kontra. Va soulaz azot, kansréti in pti pé... mé konm dann gouvèrnman la droite, la goumant la par bann koléktivité i doi péyé ; mé bann koléktivité, la posh lé plate. Zot i gingn pa pèy zot kate-par. L’èr-la, bann kontra i apèl dor-la é dmoun i gingn pa. In shanjman ? Mizing-mizing-mizing.
In pti gine ! in pti gigine ! in pti zïng ! in pti mizing ! Bon, lé bien vré, i fo pa ou lé pli présé k’lo vyolon. I fo ou i dans èk la mizik. Konm di lo kont, i fo ou i réspèk lo tinpo. Mé ziskakan ? O moin, gouvèrnman i doi di kansa va komans oir lo shanjman, pars domoun lé riskab maziné : oplis i shanj, oplis lé parèy. Bouz in pé gouvèrnman !

NB : Mi komans konpran in pé myé pou kosa demoun la pa fèt la viktoir la gosh. Mi konpran in pé myé pou kosa demoun la bash lo votaj.

 Justin 


Kanalreunion.com