Oté

Oplis in sinz i mont o, oplis i oi son déyèr !

Justin / 21 zwiyé 2016

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, zordi mi ékri aou pars mon kèr i singn par raport sak i ariv la-ba dann la métropol. Mon kèr i singn pars sak i ariv bann z’inosan : zot la pa rodé é zot té i pans lo pouvoir piblik l’avé pran tout lo prékosyon k’i fo pou ké sa i ariv pa. Ala ké l’arivé k é ké lo pouvoir piblik la pa gingn anpèshé pars li la pa gingn pran lo prékosyon k’i falé. Ala pou kosa mésyé Sarkozy la donn azot lo grin dann télé, la donn lo grin la gosh o pouvoir. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, moin lé sir ou i mazine si la droit i ariv o pouvoir, èl va fé mirak ! Poitan kan li la pèrd pouvoir lo tangaz té fine komansé é lété a prévoir ké lo tan té i sava gate ankor plis.

L’irak, l’afghanistan, La syrie, la Libye. Tout té i pète partou é bann péi konm La Frans, L’anglétèr, l’Amérik té apré mète z’ot né partou. Partou zot la parti agrav lé shoz. I paré mèm z’ot sèrvis ségré, té apré zoué lo l’apranti sorsyé partou. I paré mèm ké sé zot ké la fé Daesh pou règ lo kont La Syrie. Daesh la transform an Ei.

Ala zordi sak i ariv : lo pèp fransé - konm d’ot pèp !- lé pou arien la-dan - mé sé zot k’i gingn lo rotour d’flam. Tanka mésyé Sarkozy, sof lo réspé moin nanan pou li, mi ranvoy ali lir lo provèrb moin la ékri an-o la : « Oplis in sinz i mont o, oplis i oi son déyèr ! ». I pé di ankor : « Si ou i mont dsi pyé koko, pran prékosyon out pantalon la pa déshiré par déyèr ! »


Kanalreunion.com