Oté

« Oplis la lang lé long, oplis la vi lé riskab d’ète kourt ! »

In kozman pou la rout

Justin / 24 octob 2016

Isi La Rényon, lo ladi-lafé lé konm in éspor. Oplis i rakont dé shoz k’i fo pa dsi in moun, oplis zorèy pointi lé braké dann la diréksyon pou antann malparlé. Sa la pa in bon n’afèr, mé sa i anpèsh pa d’moun fé, arfé, épi arfé ladi-lafé. Zot i souvien lo roi Midas ? A s’ki paré, li l’avé zorèy bourik é pou koif ali son bann gard-kor té i sar rod in koifèr épi téi di ali si li répète sak li la vi, va koup son lang. Na métyé danzéré dsi la tèr ! Donk in zour la shyass la vouli ké lo sor i tonm dsi in zène koifèr. Mi pé dir azot lo ga la près tonm fèb kan li la vi zorèy lo roi. Astèr, fèrm out také pars la mor i atann aou ! Lo koifèr, la fouy in trou dan la tèr épi li la di dousman dann trou-la : « Midas, lo roi Midas nana zorèy bourik ! » . Mé ala ké lo van la antann sa épi la kolport so nouvèl-la kaz an kaz pou rakont lo zistoir si tèlman ké lo gran matin lo brui té fine ariv dann palé lo roi é ké bann gard kor la vni kapaye lo koifèr avan solèy i lèv épi la koup son lang. Vyé zistoir-la, vyé lézann si zot i vé, i amontr anou in gran loi : sé fèrm son také otan ké ou i pé, tansyon pangar é sirtou kroi pa ké i pé pa antann aou. Mèm lo mir nana zorèy. Alé ! ni artrouv pli dvan sipétadyé !


Kanalreunion.com