Oté

« Oplis ou lé anlèr, oplis ou i amontr out déyèr »

In kozman pou la rout

Justin / 22 zwiyé 2016

Kozman-la, moin lé pa sir sa in kozman rényoné ! Mi pans kant mèm li lé valab partou ousa ou i lé, dann n’inport ékèl sosyété ou i viv. Lé normal in moun i vé ète pli o ké li lé. Pli o ? Pli inportan dann zyé lé z’ot épi dann son prop zyé. In pé i pans i sifi ou lé pli rish, ou na lo pli gran kaz, lo pli zoli l’oto, out z’anfan i réisi bien dan la vi, pétète out fiy sé in rène dé boté. Mé oplis ou i ariv grinp l’éskalyé la sosyété, oplis demoun i rogard aou, oplis demoun i oi out tourné-viré. L’Onm-konm lo fanm-la pa parfé : li na son défo é sa lé bien normal… In pé i pans sa sé lo rézilta lo péshé orijinèl ! N’oré d’zafèr pou dir la dsi oui ! Donk oplis ou lé anlèr, oplis ou i amontr out défo. Mé pou kosa i anparl lo détyèr ? Mi koné pa bien ozis. Pétète lo déyèr dann lo sans son rol dann nout fizyolozi. Sé kant mèm li k’i évakyé lo déshé nout l’izine intèryèr… Alé ! Mi éstop tèr-la. Ni artrouv pli d’van.


Kanalreunion.com