Oté arèt fé patin la kaz sanm nou !

Dopi yèr travay la rouvèr pou désértin moun i travay dann biro, diran in sominn, di 9 févryé ziska lindi 16 févryé banna i pran lo non pou sak i vé rant dann ron lo 22 Mars pou zéléksyon départmantal. Tout lé prévni, aprésa si ou la mank lèr, oki bourik pou ou. Sanm pou mwin sa in zéléksyon i ral pa tro d’moun, dan mon tourné-viré mi wa pa tro banna fann la poud konm té i fé dan lo tan. Kiswa zot i konsidèr sa in zéléksyon i kont pou la po patat ousinonsa la poud i komans dovni rar pou zot. Mi di sa konm sa, boudikont, zordi i fann pi la poud konm sa dirèk-dirèk.

Zordi banna lé pli fité, i zoué lakordéon èk nou, i donn pi larzan konm sa, zordi i zoué plis èk la misèr d’moun. Konm shomaz i karsèr, zènn a ou, vié a ou, i tonm fasil promèt in kinzinn shakinn, va fé in klé pou out zanfan. Konm la kaz firamézir la pwin pou tout, koué i kout in kandida promèt in kaz ? Si i mank a ou in moné, apré ou pass o ccas, va glis sa dann out posh. La kaz i koul, domin na rofé lo twa, inkièt pi. Pou bann vié dan lo klèb, nora lo bis pli souvan ou koné a mwin dopi lontan, ou pé kont si mwin...

Ala koman i koz zordi.koman lo minm i barbouy a nou, lo minm i pinn a nou ? Boudikont lé vré pou vréman i larg pi la poud konm té i fann lontan mé final de kont i rovyin o minm, i ashté d’moun otroman kand minm. Poitan a sak fwa néna in réform banna i dovré pran an kont tousala, Sépousa ni di nou, in bononm in manda, in madam in manda. Sinon lo tan va sanzé, mé lo mové labitid i rèss. Oté arèt fé patin la kaz sanm nou !