Oté

Oté, mi pé pa kapot la tèr konm sa !

Témoignages.re / 19 octobre 2013

La la giny in ti pé d’plui ; mi di ma mèt inn ti pé langré dan mon ti karo mayi ; minm si lo pov mayi la soufèr ek la séshrès ; na esayé ne srès giny baton po manzé zanimo ; sinon sa inn grin zantak.

Mon voizin i di a moin, o lié koup kout pios lo bann souch zakasi, pran in péltèz ; 40 éro lèr, dé troi zèr tan ou la fine netoy tout lo karo grand zerb, boi d’pavoyé, zavoka maron tou sa .

Oué dakor ma nétoy vit ; an vitès, tout lé propr ; lo problém sanb po moin, sé ke si mi retourn tout la tèr ék la masine, na in nafèr i kolar pa po lagrikiltir !
Moin la touzour apri, kan in plant i pous li pran sèl minéro ek substans organik dan la tèr ek son bann rasine ; mé kan li krèv , kan li fine vié, li sek sir plas, li tonm, li pouri, tout lo bann tiz ek lo bann feyi i ardépoz sél minéro sanm substans organik dan la tèr la minm prè d la sirfas lo sol ! Sa dépi dé milion dané !

A ou, kan oui viin planté, oui fouy in trou po mèt ou bann somans ; lo grin i trouv tout sir plas po li arpousé ; si ti vé anrishi, ti mèt la sann po lo sél minéro, lo fimié po lo sibstans organik.
Mé si ti artourn tro la tèr èk bildozèr, lo sol dosou i armont, i tonm tro pov po bann plant biin pousé, anfin i sanm a moin !

Bann feyi i pouri i apèl sa imis (humus en fransé) ; oui giny sa kan oui fé konpost…
Tout so bon matièr lé tro anfonsé si ti pran gro gro masine po défons ton térin ; anfin moin lé pa spésialis mé on diré ke po moin, mi pé pa kapot la tèr konm sa !

 Justin 


Kanalreunion.com