Oté

Oté volèr, a koz ti arash mon pié d piman ?

Justin / 15 zwiyé 2014

Na in pé moin d 2 zan, moin la mont si in térin kouver an gran zakasi an gous, tout sort ti pié d boi konm pavoié, zavoka maron ; moin la koup a tèr, moin la défonsé é moin la komans planté sak moin la ginyé.
Konm na poin tro d zabitasion otour, mon bann zami i di a moin :« ti plant po bann volèr ? » Dot té i di : « bof, zot va ramas in kari, zot i kasra pa tout, va rés toujour o pié po ou, inkièt pa ! »
Mé lot jour la, mi sar bat in karé voir si i trouv dé troi chouchou po la propriétèr lo térin, mi voi na inn la arash mon pié d piman martin.

Oté moin la pa planté éspésialman ; mé konm mi manz, dawar in grin la tonbé ou bien in martin la larg son krot par la.
Kan moin la arash lo mové zerb otour lo mayi, moin la rekonu toutsuit lo ti pié piman ; mi pé pa konfonn ék in pié kol-kol, pikan, zerbabouk, ou galabèr ; son feyi lé spésial ; moin na lo zié po rokonèt ; donk, mi mèt 3 gro rosh otour ; mi di :« a, ala in nafèr i fo bien prézervé... »
Lé vré, kan moin la konstrui mon park kabri in pé pli o, moin la in pé abandoné : mayi fine rékolté ! Périod la pli larivé ; zerb la telman pousé, in moman, lo pié piman, té i voi pi ; rézman moin lavé plas la in vié fotéyi plastik po moin artrouv a li ! Moin sé kas tout bann brans brinzélié té i zinn a li, flèr jone, liane rézin maron, mil féyi ; dégaz po li giny lèr, limièr po réspiré.

Li fine komans fléri : sominn ansuit, ti piman vèr lé la ; lankor tro tann po manzé.
Bayoun piman la, la pa u lo tan nir rouz ; na in volèr la nir a bou arash lo pié an antié !
Li noré pi ramas inn ti ponyé po fé in rogayi ; lés lo pti ni pli gro ; lé méyèr kan li lé dur sou lo doi ; lès in pé po sak la véy a li pousé, li la giny son fimié,son ti grin langré tout.
Domin toué minm ta giny la somans.
Réspèk lo travay out kamarad, out konpatriot.
A koz ti arash mon pié piman ? In ? Oté volèr !

Justin



Inn modékri, inn ti lavi, inn komantèr ?



Bann modékri andann forom






  • justin, y resté à ou met un kaméra caché ou in lalarm mé ou koné nana mouns y koné

    pas la sueur, la transpiration, çàt y fé plis mal , cé kan band volèrs y vole à ou out joli

    loto 23000 euros , ke ou la lèv grand matin po allé rode largent po travaille po gaingne

    fé plaisir à ou in tit pé dans ce péi ki arrête pas dir à ou "cé la kriz, cé la krizé" ièr soir

    kan moin la vi la télé, feu d’artifice si la Tour Eiffel, koçàçà, lété zoli mé somanké out

    volèr piments noré gaingne un pied gratuit si lété pas la kriz.

    Article
    Inn modékri, inn ti lavi, inn komantèr ?


Kanalreunion.com