Oté

Oté, zordi Justin lé tris, pokoué ?

Justin / 9 novanm 2013

Nout tout i doi mourir in zour, sé sa k’mon papa té di a moin souvan.
Mé avan yèr, in kamarad, ansyin prézidan FCPE (paran d’élèv), i apèl a moin po di a moin : « Gilbert Jean-Jacques lé mor ». Nou lé vréman peu d’shoz, in maladi rapid la anport a li, sé d’zafèr i ariv toudinkou, i anons a ou konm sa, ou la pa u lo tan konèt si la persone lété malade. Mé ki lété Gilbert Jean-jacques po nou ?
Po moin, i remont o moin lé zané 70-80. A moin instriktèr Séméa, Jean-Jacques instriktèr FFC (Franka), animatèr foyé sosyo édikatif Lisé agrikol Sin-Zozèf. Li té dan la formasyon CAPASE, in gro diplom lanimasyon. Sa la Zénès é Spor i mèt sa an plas po bann résponsab striktir inportan, konm mézon la kiltir, médiatèk, téat, tou sa la.
Mé Jean-Jacques la pa kontant a li désa, li la été osi dan la politik, diréktèr kanpagn in kandida la Posésyon dan lé zané 80. Moin mèm atasé kiltirèl Sin-Lui, moin la fé apèl a li po diskit in prozé èk inn formatris insèrsyon.
Anfin, dèrnyèrman, ni artrouv a li sékrétèr zénéral départmantal FCPE, plizièr zané, mé égalman prézidan.
Donk in militan lédikasyon, militan kiltirèl, politik dan nout péi, in kréol dobout, po résponsabiliz nout bann zénérasyon marmay, gran moun, partou, ninport kèl nivo.
Gilbert Jean-Jacques, ou sa va, ou la été in modèl konbatan. Nou va regrèt a ou, ni oubli pa ou, nou anvoi nout kondoléans tout sak la koni a ou é partikilièrman out fami, out zanfan.
Justin lé tris.

 Justin 


Kanalreunion.com