Oté

Ou fé révé 799 999 personn po kontant inn… Tro d média va tié lo média !

Justin / 15 mars 2014

Zot i antan konm moin, ke zot i vé ou zot i vé pa, so bann radio tout la zourné i koz i koz ; ou pé pansé ke sa i fé pa ke du biin a la sosiété ; oui kalkil kèl nivo mazinasyon i port domoun isi ou la ; mé parfoi ou lé a demandé si lo sistèm lé pa fé po andor domoun, lé antrinn fé prann a ou vesi po lantern konm di bann fransé ; pars na in bon pé va kalkil : sak in moun i di si in vil, in nafèr laspas dan son kartié i fo zénéraliz sa tout la Rényon ; fétatansyon, so matin minm inn kandidat in méri i koz si in pronostik, zot la antandi parlé sak i apèl sondaz, la i fé in plan si la komèt ; él osi él i arrant dan l trin !

Bin dizon tout moun la giny in pikir landormisman ; nou la fine ariv konm robo ; klone ; la mèt a nou in programme informatik dan nout tèt, ni rézone tout konm in sèl masine ; o plis la kanpagn éléktoral i avans o plis ninport koué i sort si lé zantèn !
Po inn i sar giny inn ti moné po inn ti zé dazar o téléfone, 799 999 lé oblizé ékout sa !
Ti di k dan ton somin na inn la insilt a toué si in mir akoz pétèt toué na poin la minm opinion k li !799 999 domoun lé oblizé akout sa !

Na minm, o lié apèl diréktoman lo responsab li la bozoin, li préfèr di la radio son problinm… é li arprésiz, si li pas pa par la radio, lo responsab va pa fèr sak li la domandé !
Moin lé pa antropolog ; ni sosiolog ; mé nout popilasyon la Rényon la bézoin in bon psikotérapi, donk in psikiat po koléktivité,- mi koné pa si i egzist ?- ; tou sé désord si lantèn i ar anbrouyi ankor plis lo déba ; nou nana in problinm an so moman ; lé pa sin ; lé média i arfasilit pa lé soz, sé mon avi ! Ma koup mon radio si i kontinié !

 Justin 


Kanalreunion.com