Oté

« Ou i ansèrv long vi, mé i oi pa zis dovan ou ! »

In kozman pou la rout

Justin / 30 mé 2016

Oir loin, sa in n’afèr lé bien nésésèr. Ou i pé mèm mète long-vu konmsa ou i oi pli loin é ou i grosi lé shoz. Donk sa sé in bon n’afèr ! Pars, la plipar d’tan demoun i rogard zis sak nana dovan z’ot pyé ou sansa otour d’zot ; dann l’arondisman, konm kréol i di ! Sé kosa oir loin ? I pé oir loin dan l’éspas ! I pé oir loin dann lo tan ! Mé oir zis dan lo prézan, zis dan l’androi ou i rès sé la pa bon. San krétiké, sanm pou moin, isi La rényon ni oi pa loin konm k’i fo.L’idéal sé oir loin épi oir pré, domi-loin é domi-pré pars konmsa ou i pé dir ou nana in bon poinn-vizé dsi lé shoz. Long vu lé bon pou oir loin, mé lé pa bon pou oir pré : donk lo poinn vizé la pa sifizan. Sé pa kosa zot i anpans, mé moin mi pans konmsa ! A pli dvan mon bann dalon..


Kanalreunion.com