Oté

Ou i konpran si nou lé fatigué !

Justin / 3 novanm 2011

Matante Zélida la ékrir Justin :
Mon shèr nové, mon spès salté,
Touléka, oplis mi suiv azot, oplis mi romark zot lé pa rokonésans pou vréman. Pou kosa mi di sa ? Par raport dekoi, mi di sa ? Par raport lo linsandi ankor in foi. Alors, la Frans la anvoy anou in kantité d’moun pou tinn dofé, inkantité matéryèl, épi in bann shèf bien konpétan é pou zot, bann rouj-de-fon sa i si pa ! Zot i vé bonbardyé dolo, pars solon zot na arienk sa lé kapab kal lo fé. Na bo dir azot, bonbardyé d’lo i ansèrv de rien, dann in montagn konm nou nana, manyèr lo fé i pran, é la otèr li doi alé vant plin dolo ; mé zot i kroi pa arien ; zot lé konm zanfan gaté apré fé kapris. La pa for pou zot ! Tok, pran sa pou toi !

Justin la fé pou répons :
Mon vyé matant k’i koz touzour la boush rouvèr,
La prèv lo bonbardyé té i ansèrv de rien, gouvèrnman la anvoy anou dé plito k’inn. Pars si zot té sir té i ansèrv pa arien, pars si zot l’avé vréman la prèv k’i ansèrv de rien, zot nora pa anvoy bonbardyé d’lo. Pétète k’i ansèrv ar pa derien, si lo bann l’aviyon i ariv apré la batay. Pétète, mé si lo fé i ardémar,si lo van i arpran… l’èr-la norala prèv k’i ansèrv ou sinonsa k’i ansèrv pa.
Tout fasson, matant, vi koné ni èm l’égalité. Ni konpran pa ké la-ba banna nana moiyin é nou issi nou la poin. Ni mète anou an shalèr, kan nou la poin l’égalité, pars i fé plis sinkantan sa i dir é ni kour touzour déyèr l’égalité san trapé. I fo pa konfonn la sharité avèk lo droilo mèm moiyin : nou na o droi an avoir lo mèm moiyin ké dan La frans pou défann nout natir. Pli fort rézon, kan l’égalitéi zoué i bon rol pou nou. Donk, matant, la pa in késtyonn rokonésans, mé in késtyonn droi.
Dépi lontan, la zoué pou nou lo rofrin la parité kont l’égalité. Dopi lontan i di anou, i fo nou lé rokonésan pou la mèr patri. Dopi si lontan kan ni domlann la zistis i bonbard anou kou d’in soidizan sharité. Ou i konpran si nou lé fatigué.

 Justin 


Kanalreunion.com