Oté

Ou I pé pa shanj lo pèp kant mèm !

Justin / 13 zwiyé 2015

Souvan dé foi avèk mon bann kamarad, nou na diskisyon. Ni arfé é ni défé lo mond. Ni trouv solisyon pou tout sort kalité problèm, mèm sak lé pli konpliké. N’ya ka ! La pa touzour konmsa mé désèrtène foi lé aproshan. Pou kosa mi di sa ? Pars lé shoz lé konpliké, bann fo profète lé pa rar, pèr noël i pass tazantan. Donk na d’moun plito ké pans lé shoz i rézoud ar pa konmsa par in sinp klakman lo doi, i di alon fé konfyans épi na oir apré. Sa lé konm demoun i vé vni rish an zouan la lotri !

Kan mi di la solisyon lé konpliké, sa lé bien vré ! Si lété sinp na lontan té fine trouv son tik-tak. Konpliké par koi ? Par l’fète ké bann fors réaksyonèr lé bien armé késtyonn médya, késtyonn l’arzan pou la koripsyon ! Arzout èk sa lo bra dé sak i apèl (in pé a tor) la zistis lé touzour la pou ansèrv bann konsèrvatèr-mèm si zot i di non, mé lé konmsa ! L’aparèy d’éta osi lé la ! Anplis ké sa, si ou na poin la fors l’ékonomi lé dir pou ou. Na d’ot rézon, biensir ! Na mèm in rézon dann ou mèm osinonsa dann sak ou i pans sé out z’ami.

Alors lo pèp la-dan ? Li lé sou l’éfé bann fors kontrèr, i tir ali a i, i tir ali a dya, é si son kapasité pou rézisté lé afayi, ala ké li lès ali tronpé, roulé dann la farine ! Ala ké, konm in pé i di, li amenn dolo dann moulin son z’ènmi. Kosa i fo fé si ou i vé pa lès out bra tonbé ? I fo trouv in tik-tak pou avansé. In bato a voil i avans bien dann sans lo van ! Li avans mèm kont lo van ! Alors sé lo bon téknik la k’i fo trouvé.
Tout fason di aou bien, ou i pé pa shanj do pèp, donk ou i fé avèk !


Kanalreunion.com