Oté

Ou i vé mète anou asiz dsi ti-ban ankor in kou ? Kroi pa nout zyé lé boushé kant mèm !

Justin / 10 out 2015

Kosa ou i rod ou la ? Mésyé lo minis dé zé né sé koi. Mi oi aou avèk out lourde sabo ! Ou sré pa apré pansé ké apré an avoir mète anou dsi ti-ban dann la COI, ou i sava fé lo mèm z’afèr avèk nou dann lo zé dé z’il ? Pars in pansé konmsa i pé vnir dann la tète in kolonyal konm ou. Sé pa si ou i suiv amoin bien ou la ?

Alon artourn in pé an aryèr : si la fé la COI sé pars, momandoné, bann moun bannzil l’oséan indien la pans l’èr té fine arivé pou nou rékonsilyé in pé. Pou kosa rékonsilyé ? Pars dopi dé z’ané é dé z’ané nout rolasyon lété pa konm k’i dovré ète rant bon voizin. I di pa La Rényon koloni kolonizatris ? Sa i vé bien dir sak i vé dir ? Nout zénérasyon la pa fyèr kan ni koné sak nou la fé Madégaskar. San k’nou la vouli pou vréman nou la ède lo kolonyal fransé amenn son politik dégélas. Ou i suiv amoin ou la ?
Sak La Frans la fé dann bannzil komor té pa tro intérésan non pli. Mi pans pa ziska 1975 zot la vréman ède bannzil komor a sort dann fé noir épi a dévlop lo péi konm k’i fo. Konm Paul Vergès téi di par raport la rout litoral : ni vé bien diriz rout-la par nou mèm mé i fo romète ali o norm ! Sé pou sa ké la fé lo l’akor Matignon. Donk, mi pans, si La Frans té i vé donn l’indépandans Komor, té i falé donn lo moiyin, prépar ali é tou. Sé pa sak zot la fé ! Ou lé dakor avèk moin mé pétète ou i s’anfoutsa ?

Astèr kosa ou i vé fé avèk zé dé z’il ? Ou la pa apré mète anou asiz dsi ti ban ankor in kou ? Pétète ou i pans sé in l’okazyon pou La Frans do kroiz avèk bann péi l’oséan indien sak nana, in bon avnir. Kisa ? Madégaskar, Kénya, Tanganika épi d’ot ankor. Do moun na bo dir l’éspor sé l’éspor, i mélanz pa avèk d’ot shoz, mé a bien oir i pé rann pli fasil l’antant ékonomik, l’antant kiltirèl, mèm l’ésploitasyon bann rosours natirèl. Is’nt it ? Alor si par La Rényon lé posib rant dann in l’antant pli gran i fo pa krash dési. Ou i pran pa nou pou shoval de Troie mi éspèr ?

Mé nou alor ? Ni ansèrv arienk pou donn l’okazyon épi i mète anou asiz dsi ti ban. Mi oi klèr dann out zé dan sète in sèrtènn Frans. Kroi pa nout zyé lé boushé kant mèm !


Kanalreunion.com