Oté

Ou manz kari tang ?

Justin / 10 décembre 2013

Kan moin té marmay, mi té wa apré la pli monmon tang èk in dizèn ti i suiv a èl. Mon gran frèr i di a moin : « Si ti vé trap in tang, lé fasil, ti pran in brans èk in fours konm in Y, ti pèz a li si lo kou é pi ti trap déryèr la tèt… », mé ou la pèr kant mèm, ou na linprésyon i sar pik out min, èk sa lodèr oté…

An syans, ti apran an fransé, sé lo érison.

Pa tout moun i giny fé kui tang, pa tout moun i manz tang, son lodèr i done konm in dégou…

Non, pa ditou, i fo lanbyans…

Koméla i fé osi sivé èk lo vin rouz.

Lot zour, mi trouv in boug, li apèl AP (mi fé konm Balzac, mi di pa lo vré nom, talèr zot va rokonèt !!!). Ou sa ? Dann in bar. Li d’mann a moin si mi bwar in kou — zot la konpri — lé pa in zid’pès, mi di a li non, mi sar war inn kamarad, si mi san lo ronm dizèr lo matin, va pran a moin po in lalkolik.

AP i d’mann a moin koué i fé la Fèt kaf sèt ané. Mi di a li, pa d’problèm, ni arorganiz inn.

Sé la li di a moin : « Vyin domin tèl èr, tèl niméro, tèl ri, manz kari tang ! ».

Justin pa po rofizé.

Lo swar, li mèt in gran fèy fig milyé la tab, li kapot lo marmit do ri o sant, li aroz gro poi, lo tang li mèt an plizyèr ti ta otour, na in pé i mèt rougay mang èk bon pé pèrsi, sinon salad konkonm èk piman lé pa lo dernyé.

Sirtou, lav ton min, manz èk la bous, ti vé konèt konvivyalité kréol…

Lot zour, sak la fé kui la di a moin, tou lé zan mi fé… zot i konpran, li vé pa pèrd la min.

Sé sa la kiltir : kozé, ésanzé, manzé, bwar, rir, rakont ton somèn, la pli sinon sa solèy ki pouak, parl politik, zéléksyon, tout… zoué in maloya.

A moin, mi trouv bon lo kari tang !

Justin


Kanalreunion.com