Oté

Overshoot : dépasman ! La mor l’imanité ? Alon z’y géman !

Justin / 15 zwin 2016

30 mai 2016 : La Frans la fine manj son kantité poisson, èl i produi par ané. Donk si lo péi téi doi kont solman dsi son prop prodiksyon, dopi lo promyé zouin noré pi ditou poisson dann z’asyète bann fransé. Konm zot i doi manz poisson ziska 31 désanm, sa i vé dir i fo zot i kont dsi la prodiksyon lé z’ot péi.

Késtyon : alor lé z’ot péi la pankor manz z’ot kota ? Non sa i vé pa dir sa pars lo mond antyé nora fini iz son kota lo promyé zilyé. Sa i vé dir galman lo péi i manz lo poisson lé z’ot i manj pa. Sa i vé di ankor bann bato fransé i sava pèsh in pé partou, a komansé dann l’oséan indien : la prèv ? Lo kontra lo ton avèk l’il Moris k’i pé an avoir in sèl rézilta sé d’vid la mèr la zone la pèsh bann morisien… Dopi lo promyé zour moi d’zouin La Frans i manj o pyé : él i konsome pi son prodiksyon, li manj lo stok. Zot i koné sa la ap bon, kan ou i sava atak lo stok out l’antropriz.

Donk, i fo pans sèryèzman shanj nout réjime manzé : sa lé vré pou poisson, sa lé vré osi pou la vyann. Pou lo poisson i fo arète avèk la pèsh indistriyèl k’i tyé vèr é sèk é k’i vid la mèr firamézir. Pou la vyann i fo diminyé nout konsomasyon pars la tèr i gingn ar pa done anou satisfaksyon… Romark ni pé kontinyé ankor konmsa pars in pé i komans fabrik la vyann artifisyèl ! Ziska kan de moun va invant kalité la foli konmsa ? Ni pé kontinyé pars konm i di i fo in koz pou la mor-la mor l’imanité mi vé dir ! Alé ! Aloon z’y géman !

NB Lo GIEC-in l’asosyasion mondyal i okip l’anvironeman - i konsèy anou arèt manj la vyann in zour dan la somenn. In zour dan la somenn, sa la pa in bonpé sa kant mèm !


Kanalreunion.com