Oté

Pa d’akor èk bann foutèr d’dézord, bann foutèr ‘panik

Justin / 14 zanvié 2015

Matant Zélida la ékrir Justin :

Mon shèr nové, mon spès salté, rouj-de – fon dovan l’éternité, l’ané i komans mal mon nové é moin lé sir sé pars bann fann-gars téroris, la trouv moiyin pou fé in ta krime toutinkou. Banna lé mové konm lo dyab épi zot i anpar azot dsou paraplui Bondyé. Zot i arprosh bann désinèr an avoir fé karikatir zot profète. Zot i arprosh lé zot pars zot lé juif in poin sé tou. Moin pèrsonèl, mi pans zot la fé sa pars in pé rantre zot, bann rouj-de-fon, la donn azot kouraj pou fé in krime konmsa épi la trouv moiyin donn azot rézon, vi ké la donn tor bann partizan lo mond lib : la frans, l’amérik, épi lé zot ankor. Tok ! Pran sa pou toi !

Jstin la fé pou répons :

Mon vyé matant k’i koz touzour la bouh rouvèr. Sak vi di la pa pou étone amoin pars konm di lo kont zot i rode pous zot palé pli loin konm i di dann la marèl. Pou moin pèrsonèl bann péi konm l’amérik épi d’ot la parti mète zot kiyèr sal dann marmit i kui pa pou zot é konm di lokot zot la rouv la boite Pandor. Kisa la komans alé bonbard La Libye, alé oir la libye té i blok bann téroris. Kisa la parti fé la guèr gouvernman L’Irak soi dizan l’avé bann z’arm déstriksyon masiv. Kisa bann fourné la parti sèy shanj gouvèrnman La Syrie. Pir ksa, dann détroi l’androi zot la fé in pakt avèk lo dyab. Pou arprann léksprésyon, zot l’atèl lo dyab avèk zot karyol… Kan ou i baz pa dsi la moral, dsi bann bon prinip, kan ou i nouri lo vèr, i ariv ké li pik out kèr… Donk demoun lé kont bann téroris, sa i fo, mé zot i pé pa ète pou bann foutèr d’dézord, foutèr d’panik in pé partou. Tok ! Pran sa pou ou !

In kozman pou la rout : « Mi nouri pa lo vèr pou pik mon kèr ! »..


Sans prop : zot i koné nana désèrtin vèr i armont dann kèr d’moun épi lé pa malizé pou fini avèk ou. Sans figiré : ou i sava pa fé in n’afèr va mète aou dann l’anbara aprésa. Ou i pran in mové désizyon, é aprésa sa i mète aou dann malizé. Sa na mèm in sans dan la politik : méfyé lo kandida ou i vote pou li, é aprésa li trok parol, li promète aoul o bien, mé li donn a u lo pir. Fé travay zot koko ! Fé bouy zot matyèr griz é aprésa zot va oir si rant rant ni tonm pa in pé dakor ansanm avèk.


Kanalreunion.com