Oté

Pa in guèr prop, mé in guèr sal, konm nana tan-é-tan !

Justin / 3 mé 2011

Bien sir, la guèr sé la guèr, é dann in guèr, i tyé d’moun. Sa lé sir ! Solman, nana i vé fèr kroir, zot i fé in guèr prop, tanka lé z’ot, zot i fé in guèr sal ; lé vré ossi, nana bann loi la guèr, é si ou i réspèk pa so bann règ-la, lé possib i pé ziz aou, in zour, pou bann krime la guèr. Nana mèm in tribinal, koméla, i fé pass an prosé bann kriminèl la guèr ; Nana mèm dé shoz "rigourèzman" défandi, mé k’i fé kant mèm, provi k’i trap pa ou, sansa provi k’ou nana in bon protéksion.

Donk, bann z’alié l’OTAN, koméla, i fé la guèr pou sèy ranvers lo pouvoir lo kolonel Khadafi. L’OTAN épi lo bann z’alié i bonbard Tripoli la nuit. Khadafi, son tour, li na pi l’aviasion, l’èr-la son bann troup i atak atèr. Bann robèl, zot tour, i fé konm k’i gingn, avèk in larm-man la fine pass la mode, zot i sèy défann épi ataké... Dann in guèr konmsa, la kominikasion i zoué in gran rol ; la kominikasion mantèr sirtou. Mé zot la fine gard télé, zot i arkoné konm moin kan i ramas mantèr é kan i di la vérité.

Dépi plizièr somenn, la bann Khadafi, l’OTAN i vé tyé ali ; l’OTAN i réponn zot sé d’moun i koné viv, donk zot i vé solman détrui lo l’armé. Avan yèr osoir, bann l’avion l’OTAN la bonbardé ; In kou d’azard, lo bonm la tonm déssi la kaz Khadafi ; i prétan dir la tyé son dèrnié garson épi troi an parmi son pti zanfan, soman la pa nyabou toush lo gramoun. L’èr-la, l’OTAN i prétan li la pa aviz la kaz lo kolonèl, konm li aviz pa bann popilasion sivil.

Moin, mi poz amoin in késtion. Mi di dann mon kèr, si lo mèm problèm té i éspas dann in gran péi avèk in l’armé térib-bandé, kosa bann l’OTAN nora fé ? La pa bézoin poz la késtion, pars ni koné zot nora pa lèv ti-doi, é zot nora kontant donn manzé la lang. Sa ni koné ! Konm ni koné, la guèr i fé la-ba lé pa in guèr prop, é toute pétrol nana dann la Libye lé pou kékshoz dan la guèr ; sanm pou moin, guèr-la, konm d’ote, la pa in guèr prop, mé in guèr sal konm nana tan-é-tan.

 Justin 


Kanalreunion.com