Oté

Pandann tan-la, kabri i manz salad !

Justin / 14 févrié 2011

Si zot i suiv in pé l’aktialité dann l’ékonomi La Rényon, moin lé sir zot i romark lo trikmardaz l’apré s’passé. In pé l’antropriz la shanj de min, in pé la fèrmé, in pé la mète bann travayèr déor. Sirtou, mi pans zot la bien vi bann mèrsnèr l’ariv déssi nout marshé pou kapar sak lé ankor in pé valab. Lo pti pé k’lé ankor valab !

Pars, fransh vérité, nout l’ékonomi i sava an dégréné. L’agrikiltir lé fay par raport nout prodiksyon intéryèr. La pèsh la pa dévlop konm k’i fo. L’indistri, son koté, la bien afayi. Sak i apèl lo tèrsyèr la manz lo pé, é an parmi lo tèrsyèr i fé son ni dann bann transfèr piblik. Sak i apèl la défiskalizasyon, avèk son bann shanjmann loi, la pass par-la é lo rézilta lé sak ni oi koméla.

Biensir, kan ou i marsh in pé dan La Rényon, ou i apèrsoi nout péyi nana son kapab, mé konm di l’ot, si son kapab i rèss konm zèrb fol, kossa i pé fé avèk. La jénès nana son kapab galman, mé soman lé dann shomaz. Alor, kèl kapasité ou i pé an avoir kan ou l’apré mark out nom é romark out nom dann Pol anploi ? Dépi lontan ni kour déyèr nout dévlopman, mé san ariv trap ali.

Poitan, sé lo dévlopman lé kapab sov anou. Sa sé in droi sa pou nou, mé l’Etat i vé pa nout dévlopman... an kontrèr. Bann gran parti la France, gosh konm droite, ziska zordi la pa trouv la klé, pétète la pa rode la klé ditou ? La droite La Rényon i konpran pa arien. Pli pir, li la pèr, si ni dévlop, sa va donn anou l’anvi amène nout bato par nou mèm. Pandann tan la, konm di lo kont, kabri i manz salad !

 Justin 


Kanalreunion.com