Oté

Pandann tan-la, kabri i manz salad !

Justin / 9 octob 2012

Na poin lontan in dalon résponsab PCR té apré di avèk rogré, kan lo parti i propoz in n’afèr na tout in bann pou di non, pou di i, pé pa fé in n’afèr konmsa. Aprésa, li domann si i fo di lo kontrèr sak ou i pans pou k’i ékout aou. Konm in pé i di dann matématik, dann tan lontan "moins par moins égal plus". I pé di ankor lo kontrèr d’lo kontrèr d’sak ou i pans, sé sak ou i pans. Biensir, in politik sa i fé pa konmsa d’apré moin, sof pétète isi La Rényon.

In légzanp : la rout an kornish. Kan na bien lontan la déside fé in rout an kornish rant Sin-Dni épi lo Por, l’avé lo shoi rant fé pass rout-la, bordaz la mèr, sansa fé pass ali par lé-o, par lamontagn par l’fète. Mi rapèl bien lo déba dann konsèy zénéral : in sèrtin Roger Payet té lo prézidan. Perreau Pradier té lo préfé. Dann group kominis mi souvien té i défann lo projé la rout par la montagn ; majorité konsèy zénéral épi préfé té i défann in rout dann fon lo pyé d’kap. Biensir lo projé bann konséyé kominis banna la anvoy dingué pars té i fo fé konm la rout an kornish la-ba dann la vil Nice... Ni koné la suit : zordi nou lé fine déplas troi foi la rout, in pé i vé déplas in katriyèm foi, ziskatan ? So kou isi pou foute ali dan la mèr. Pétète in zour, konm gramoun Lélé téi shant : « nou va pass par la montagn ! ».

I pé pran ankor in bonpé légzanp. Shak foi lo shoi in pé la fé té pou mète anou d’dan, té pou mète anou dann in trin pa posib. Tousa pou dir, isi in pé i briy pa par zot mazinasyon é an finn kont zot na poin bonpé z’idé sof pétète bann zidé bann profitèr i souf azot dann trou zorèy. I tonm bien pars zistoman PCR lé pa dakor èk sak bann spékilatèr pars dann son konba sé kont zot ké nout parti i vanj. Donk, an finn kont, lé pa nésésèr an avoir zidé i sifi dir non sak lo PCR i propoz... dann tout domène.

Pandann tan-la, kabri i manz salad.

 Justin 


Kanalreunion.com