Oté

Panem et circenses : do pain épi zé d’sirk !

Justin / 11 zwiyé 2016

La koup d’érop fotbal la fini dopi dimansh. Sak té programé pou gagné la gagné ; in bonpé d’moun lo kèr la bate an mèm tann k’sèk z’ot l’ékip nasyonal. Bann zournalis la bate tanbour dann mèm sans. La télé la difiz kékshoz konm sinkann sink match avèk in kantité lo z’èr bann komantèr désèrtin moun la batuz azot “ékspèr”. Sétaki la fé lo séléksyonèr a la plas lo séléksyonèr ! Sétaki la transform ali an éspésyalis fotbal !

Tousa lé bien, mé si pa zordi, pa domin, konm i di, la vi i ropran son kour : in bon kour pou in pé, in mové kour pou d’ot. Lo nonm shomèr la pa diminyé ; lo nonm z’ilétré la pa bouzé non pli ! Sak l’avé poin la kaz na in moi na poin la kaz ankor so moi isi. Sak i sort pas bak i doi poz ali késtyon dsi son l’avnir : arète toutsuit é déklar son nom konm shomèr, sansa rant dann in l’inivèrsité sansa in l’ékol pou rotard tanpir k’i pé lo l’afrontman avèk la vi aktiv. Ni koné la rangène é mi pans la pa nésésèr arpas lo fime.

Moin la antann in psi apré dir la koup l’érop la rann bann fransé éré. Zot i frons pi soursil mé zot na sourir an transh papaye. Bann rényoné osi lé konmsa pars bann médya lé kontazyé. In pé i diskite pou konète si sa i armète daplon la popilarité-sansa lo mank popilarité-lo prézidan épi son promyé minis. Na mèm inn la di : konm lo klima intèryèr sar méyèr la prézidan va trouv demoun pou myé ékout ali. Vré ! Pa vré ! Moin na rien a siré !

Solman, mi di dann mon kèr, dopi ké lo mond i égzis, bann shèf la touzour rode in manyèr pou dérout l’éspri l’imanité. Dann mon kèr mi di sanm pou moin, oplis i shanz oplis lé parèy dsi so késtyon-la ! L’èr-la inn-dé mo i arvien dann mon tèt : « Panem et circenses », domoun téi kriy dann tan Zil Sézar, in l’éksprésyon k’i vé dir : « Do pain épi zé d’sirk ». Konmsa mi konpran la vi ?


Kanalreunion.com