Oté

Papa momon lavé rézon !

Justin / 10 séptanm 2014

La misèr i kol si nout kor konm karapat su tété bèf mèg. Mi sipoz zot la finn antann koseman la. Sa in bon koseman. Mé La misèr koméla, lé pli pir ou lé konm sad lontan ? Po kosa mi di sa ? Avan té la misèr, in bononm té sa rod son soso dann bitasyon. Bertèl si son do, boutèy do lo dobout, gamèl manzé si koté, grankouto anparmi. Té bon pou la zourné, di matin o swar. Lo madam osi té rant dann ron dé foi, mèm kan lavé travay pou fé la kaz an plis. Té i tir lo diab par la ké anstan la.
Zordi in ot kalité la misér lé la. Travay i fé défo, shomèr lé an pondiak sirtou bann jèn, la rotrèt lé ba, La kaz la pwin pou nout tout, arzout ek sa larzan lé rar konm korn lapin. Sanm pou mwin olié davancé ni rokil é dé foi ni tourn en ron. Domoun i ésplyin a zot, i gyin inn ti katsou, mé lé pa sifizan ditou. Kan ou la finn pèy tout, do lo, kouran, mitièl, gaz etc ou na pi ryin. Koman shap ladan ? Lontan kan nou té dann in sitiasyon malizé komsa, in sitiasyon la misèr palfèt, papa té i di anou, i fo sobat, larg pa lo kor, avans dovan touzour, é momon té i arzout : Marmay alé lékol, sé komsa zot va shapé pou lontan, sinonsa zot va ral gongon plitar é zot i koné, ral gongon sa lé dir, é pi pou mié fé konprann a nou, èl té i arzout gongon la soufrans, té i may pa, Zordi sa in koseman lé ankor valab ? Mi koné pa mé dé foi mi poz a mwin bonpé kestion.

Lékol zistoman mwin osi konm momon mi kroi lé inportan. I fo zordi ni prépar domin é pou sa i fo marmay lé kiltiré, lé formé (mwin la pa di formaté), lé kapab anparé, mèm koudir é sa soleman in bon lékol i pé rouvèr la port. Tasyon mwin la pa di lékol y donn travay domoun, mi di lékol i dwa donn in métié a shakinn sinonsa in klé pou rouvèr nout port. Dé sominn déza dopi la rantré, lo tan i pas vit. Sèt ané nana in ralé pousé si travay marmay an déor lékol, in pé lamontrèr i ral dérièr. A mwin mi souèt, zot va tonmb dakor si lésansièl, paran, lamontrér, sindikat, misyé lo mèr, tousala, i fo tash maniér trouv in solisyon méyèr et sirtou fé an sort sé lintéré bann marmay ki kont, ryink sa. La pa bézion rakont a nou midi katorzèr, ansort azot.

Pou rovni si not sitiasyon konpliké, koméla domoun i anparl bonpé, shakinn na son solisyon, kisoi pou zordi ou kisoi pou domin. A mwin, mi di i fo ni fé travay nout koko, sé anou pran nout déstin an min,atann pa sak i vyin pa. In kamarad avèk ki mi diskit z’afèr lékol i di a mwin : Justin, ou kroi lékol sontousèl sora sifizan pou rég tout nout difikilté, pou démay shové nout tout, ni dwa osi kontinié batay pétèt, sinonsa nou va rèt a tèr. A zote kosa zot i pans ? É si papa ek momon lavé rézon ?


Kanalreunion.com