Oté

Pardon madanm, sa la shapé !

Justin / 30 mai 2011

Na dé foi dann nout listoir, ni kroi rasism lé mor. Patèrnalism lé mor... é anplis ké sa, léspès santiman k’i amène déssèrtin dominé a roshèrch la sinpati lo dominèr. Ni pans bann vyé santiman-la lé mor, lé déyèr nou. Alé oir, non ! Kan na in lévènman i pèrmète, so bann mové santiman-la i ropran favèr.

Dépi démil dis, kan Paul Vergès, nout ranpar la pèrde zéléksyon, nou la fine oir sa. Inn i fé tishèrt rasis. Inn, konm méssyé Copy i maltrète bann madanm nout péi anplin dann tribinal. In pé i mète bann trak rasis dann la zandarmri. Armète la-dsi in Konsèy réjyonal i pass son tan pou bèss la tète dovan lé zot. Kisoi gouvèrnman la Frans, kisoi gouvèrnman morisien, kisoi bann vyé blan l’Australie… kisoi ankor dovan bann monopol konm bann pétrolyé, l’ÉDF, sansa Air-France... konm si li vé pass pou in bon sizé par raport banna. Pandann tan-la, i done kou d’pyé dann nout dévlopman té i komans zis pou démaré.

Sa i fé pans amoin in zistoir. Mantèr, sa lé sir ! Konm di lo kont, in zistoir bann moun « bien » té i rakont dann tout bann « bone » mézon. Ala lo zistoir : dann tan lésklavaz in madam té i fé in résépsyon. Èl té an parmi son bann moun, kan toudinkou in van malkontrolé la pran aèl, la fé dézord ! Zot i konpran koman sa la annuir aèl, épi koman tout son moun la arès sézi... Orozman, in sèrvant zésklav té i pass par kote. Sèrvant-la, la koz for, la di : « Pardon madam, sa la shapé ! ». Tout lo « bon » moun la rofé... Mi lès azot réfléshi la-dsi ! Tir la konklizyon zot i vé. Moin, pèrsonèl, mon l’opinyon lé fé dépi étan pti.

Justin


Kanalreunion.com