Oté

Parèy pou nout MCUR

Justin / 30 mars 2010

Toute lé bon ! Toute lé doss ! Toute lé gayar ! L’armoni, l’armoni, l’armoni… kado Bondyé ! É Bondyé i pèrde pa lo tan pou fé sa. I di pa li la mète in somènn pou fé la tèr é toute lo tranbleman ? Alor, a-juzé in pti péi konm La Rényon.
Byinsir, sa in plézantri, pars ni koné byin, in pèp, sa i fé pa an in zour, é listoir in pèp la pa konm in mèr kalmé, in flèv trankil, in syèl san nyaz. La vi in pèp, souvan dé foi, nana dram la dan, nana la vyolans la-dan, nana l’oprésyon galman, nana la dominasyon in pé déssi lé zot… nana kant mèm inn-dé kartyé syèl blé kan k’i ariv in kourann libérasyon.
Alor, nou la bézoin konète kissa ni lé, é koman nou l’ariv l’androi nou l’arivé, é sirtou, alé pa kroir sa i koné an néssan, sa i koné san aprannn, san k’nana landroi pou nou aprann. Agard byin in liv, kan li lé fèrmé… lé rar li fé konprann anou dé shoz, mé solman, kan li lé rouvèr, si liv-la lé valab, li amontr anou dé shoz valab. Parèy pou in mizé, parèy pou in mizé vivan, parèy pou nout Mézon dé sivilizason é pou linité bann Rényoné… parèy pou nout MCUR.

Justin


Kanalreunion.com