Oté

Parol an-l’èr, parol mantèr !

Justin / 19 févrié 2010

Zot i koné, dépi dé-troi zour, in pé l’apré okip madam la ministrèz l’Outre-mèr, pars èl la di i fatig son tété oir in kantité larzan évite la Gwadloup pou alé aroz lé z’ot péi l’Outre-mèr... Moin pèrsonèl, mi poz amoin késtyon déssi lo bann kriyèr d’nuite.
Nana an-parmi bann gran zournal la Droite, bann télé, épi bann radyo pèrkal. Bon pou sa mèm ! Mé nana galman lo dénomé Vèrgoz k’i arète pa domann, sansa ankouraz l’Éta pou tir son larzan dann tram-train, sansa dann la mézon dé sivilizasyon. Li nana in kamarad, mèr Sinni, la krash déssi larzan fète pou sé pa konbyin milyon l’éro... moin la pa antann ali non pli tro rouv son gran boush déssi la rokade Tampon. Donkalor, mi oi pa pou kossa kozman madam Penchard i fé ali in n’afèr, vi ké li pass son tan domandé k’i fou koud pyé dann larzan fète-é-fourni.
Arzoute èk sa, kan la ministrèz la di l’Éta i pèy ar pa sak li doi Konsèy zénéral — plis troi san milyon ! — kan èl la di i donn ar pa lo katrovinsink milyon par an l’égalité tram-train*, moin la pa antann in bon pé protèstasyon. Moin la pa antann lo bann roproshèr roproshé... sof pou ète kontan. Donk, plito ké fé bate z’ot lang zordi, in pé nora déza dü komans par kriyé, par protèsté… z’ot solidarité avèk La Rényon... lo rèst, sé parol an l’èr. Parol an-l’èr, parol mantèr !

* Promyé minis la foute ali in boush-ta guèl pou sa !

 Justin 


Kanalreunion.com