Oté

Parol sanson, sa fé in sèrtin l’éko dan nout tèt !

Justin / 27 séptanm 2013

Yèr, moin t’apré ékri si la kondisyon la fam dan la sosyété. Apré, tout la zourné, zot i koné kèl èr i rézone dan mon tèt ? « É moin mi di osi, fanm komann pa lo zonm, fanm komann pa lo zonm, fanm komann pa lo zonm… » an 3 foi, lo santèr i di, li arpèt, i tap konm in marto.
Toué va dir a moin, sa sé la kiltir popilèr, sé in distraksyon, la vi lé dir, dann bitasyon, si shantié, i fo in défoulman, in l’antrak dan la difikilté, dakor.
Si ti di ryink sa, ti vé dir, alor « bononm komann lo fanm !? » napi l’égalité alor ? In sèks i komann lot ; l’ésklavaz i arvyin ; lo pir, ni artransmé sa nout z’anfan. Port antensyon sèrtin parol nout bann sanson ! A moin ké ti di sa ryink pou fé ri la bous ; si moin lé in profésèr an kréol, dovan mon bann z’élèv i fo mi ésplik kosa in tèks konm sa i pé véikilé konm mésaz !
Moin la kit La Rényon plizyèr z’ané ; mi arvyin, koué mi antann si bann radyo, in mizik gayar, séga byin kadansé, ékout lo parol : « Mi pay pi zinpo, mi roul dann gro loto, alé zouk mon koko… ».
Békali, é mounoir, domoun (ankor lo pèp ?) i èm sa, alé din bal, koméla i di diskotèk, mizik là i mèt byin l’anbians, bann zèn i èm mèm…
La nou lé byin, si nou près sa : « pay pi zinpo, roul dann gro loto… » poukoué ni azout pa : « grat lo boyo », asiz, travay pi, rès asisté, l’arzan va tonbé — rod pa koman —, sa kab donn domoun in drol mantalié, mantalité la parès, bin grosi dan ton grès.
Koman i fé, mi trouv sa i fé réflési.
Konm koi, parol sanson i fé in sèrtin l’éko dan nout tèt !

 Justin 


Kanalreunion.com