Oté

Pars, bien antandi, i fo pa tro inkyète lo marshé !

Justin / 8 séptanm 2011

Moin la fine antann in ga, si mi tronp pa, sé M. Mélanchon, apré di, bann gouvèrnman na in sèl sousi, sé « rasur bann marshé ». Li arzout èk sa, li koné pa poukoué, mé bann marshé la bézoin ète rasuré. Sa lé bien vré, pars si bann marshé i afol, zot i kas pa la tète pou mète lékonomi in péi, mèm in bonpé péi, ki dési tète. Donk, sak i fo, sé rasur azot, alé dovan zot dézirata pou amontr azot zot i sava gingn larzan. Tanpir si bann pèp i soufèr lo martir, tanpir si travayèr i anfons dann lokisité, si bann ti-kolon, in pé partou, i koné pi koman ansort azot.

Zot i rapèl la réform bann rotrète ? Zot i ansouvien mésyé Fillon la di sa lété pou garanti in rotrète pou bann Fransé, zot zanfan épi zot ti-zanfan ziska la ényèm zénérasyon. Figir azot, nana in somenn, moin la antann in dirizan-sindikalis apré di dann in radyo ké mésyé Fillon li-mèm i rokoné so réform-la lété sirtou pou rasur bann marshé.
Konm dabitid, gouvèrnman nana in fizi dé kou : in kou i tir pou de fo, in kou i tir pou de vré. Li di li fé in n’afèr pou tèl shoz, alé oir la pa pou sa ditou. Sa mèm i apèl la vérité an politik, solon Sarkozy. Sa mèm i apèl di la vérité bann Fransé. Alé oir l’apré sharj de lo, vèy pa koman !

Dépi inn-dé zour, gouvèrnman la domann bann dépité pou diskite dési lo plan l’ostérité ; Li vé konomiz onz milyar l’éro pou l’ané 2012. Pou kosa ? Pars i fo ménaj bann sosyété i kalkil la kapasité bann péi pou ranbours sak zot i doi. Pars i fo, anpliské sa, rasur bann marshé. Biensir, bann dépité l’UMP lé pa dakor san pour san avèk lo gouvèrnman, mé gouvèrnman i done azot an misouk lotorizasion pou modifyé désèrtin poin son plan. An misouk solman ! Pars na désèrtenn shoz i fo pa toushé, pars bann fèss-an-or i vé pa. Bien antandi, pars i fo pa tro inkyète lo marshé.

Justin


Kanalreunion.com