Oté

Pars, la pa l’èr pou pèrde ankor tro l’tan !

Justin / 14 désanm 2009

Drol péi ! Drol l’istoir ! Drol bann politik ! Akoz i fo lé shoz i pran lo tan konmsa issi ? L’ané 1794 promyé l’abolisyon lésklavaz la manké… bann z’ésklavazis la arfoul dan la mèr lé dé z’anvoiyé la répiblik. Aprésa, nou lété blizé atann vin désanm 1848 pou komans oir in pé la koulèr la libèrté. Eya ! Malérèzman ! Lo tan z’angazé lété pa in bonbon koko ! Lo tan lo kolonyalism lété pa non pli in tan fantézi ; anfin, la loi 19 mars 1946 l’arivé… mé nou la aspèr sinkantan ankor pou gingn l’égalité sosyal.
Zordi, ni komans solman, anbèk shomin dévlopman dirab… mé, pour sir, la pa in shomin galizé. Ni rann anou byin kont ! Byinsir i pé pa dir La Rényon i bouz pa... mèm li la zamé bouz konm sa dépi komansman nout listoir. Byin antandi, moin na poin la plass pou dir toute sak la fine fèr, toute sak i sava fèr, dann toute séktèr... lékonomi li, la kiltir li, lanvironeman li, l’édikasyon li. Sré tro long !
Mé sré kan mèm bon, tazantan, rapèl sa d’moun kansréti pou arfréshi in pé la mémoir demoun normal… sansa pou boush in pé lo také bann politikèr-sharjèr d’lo. Pars lèss azot rakonte z’ot bobar, sé pèrde ankor lo tan. E sa lé pa bon pou nou. Pars la pa l’èr pou pèrde ankor tro l’tan.

 Justin 


Kanalreunion.com