Oté

Paské té pa shèr, té gingn pou ryin !

Justin / 8 novanm 2014

Néna sak i vyinbou pa, i di pou rézon lé pa fé pou mwin, mwin la zamé fé sa, mon kor i siport arpa, pou zot, pa bozwin forsé, shakinn i rosan son manièr, an li mèm, mé sak i vyinbou, odrémié fé inn ti pé léspor, kansréti inn ti ponyé pou lo kor, dopi tanm p’ti minm fo komansé fé léspor. Kiswa in léspor sontousèl, ou kiswa in léspor ansanm dot. Doktèr i rokomand osi fé léspor. Néna in tralé léspor pou fé, shakinn i swazi, la kours, volé, baskèt, lo so… vélo. A mwin mi profèr foutbal, in pé i di sa la pa in sians ékzak mé défwa in pé i dovré réfléshi la d’si. In lékzanp, kan ti zoué foutbal, si ti pèrd 5 zéro la mitan i di odrémié shanz bann zoua, ozordu pa tout lé dakor èk sa , zot i pèrd mé i pèrdir, boudikont i kontinié konm avan, parl pi sak i mark kont son lékip. Néna osi.

Si foutbal tansi, la ba déor néna ralé-pousé. In lantrénèr gran lékip i di konmsa, pou bann zouar i sort lafrik, i di néna in lavantaz ashté azot dirèk laba, konm si té ashté inn ti zanimo ousinonsa in mèb, i di lé pa shèr, mé antansyon, i di lé pa shèr mé solman banna soré pa tro téknik, pa tro intélizan nonpli, plito bon pou konbat mé tou zis, boudikont néna gro travay pou fé. In pé gro dwa, in pé déménazèr pou li. Sa boug la, finn pèrd la boul kosa, pétèt li na toupé ? Pétèt osi i mank lo van dan son boul. Zordi ni koné pa a koz, poukoué, mé sanm pou mwin banna i krwa a zot i pé di tout san traka.

So lantrénèr la dikou, pou mwin la pa lintélizans ké va étouf a li, pou di sa li dwa èt in pé kré, son koko d’tèt i dwa èt sèk, konm di gramoun pinpin lé vid koué ? Lo léspor an li minm li lé bon li, mé anddan, kantité kaparèr i tour autour, i ashté po rovann, i anprèt. An plis an afrik baya, kan i parl lafrik konm sa, mové souvnans pou nou, fé mazinn a mwin tan la, lo tan lavé pwin la grèss si ti vé, si lavé inn ti ginn té rans, tan la désértin té ashté pa, té pran, té i souk. Parlfèt di a mwin : nout bann vié lontan, lontan minm, té pa foubalèr zot, poukoué banna la pran a zot an afrik ? An mozanbik sirtou sanm pou mwin, la rod laba . Zot i krwa té po foutbal ? Paské té pa shèr, té gingn pou ryin.


Kanalreunion.com