Oté

Périod la fèt larivé !

Justin / 13 désanm 2013

I san périod la fèt i sar arivé, défoi ti trouv dan ton boit a lèt piblisité ki antas…
Mè so matin, na in nafèr moin la romarké.
Dan mon vil, mi ogard sak i spas si trotoir, mi koné pa si zot la romarké, kan périod la fèt i ariv, é mi koné pa non pli si la méri la done lotorizasyon, mé bayoun, dépi dé-troi zour, mi obsèrv sa.
Ma di a zot koué ?
Sé sapito an toil tant, nana tout koulèr, lo blan, lo blé, tout form, form parasol, gran parasol la plaz, nana mèm karé, in gran poto an fèr i koulis konm parapli, pli li mont pli li dépli, li rouv gran, lo boug ou lo fanm i komans instal son tab, son nap, li rouv son karton é là li va étal son bann zartik… zot la konpri, li na po vann, rod pa koué, lé pa la kalité ki kont, sé sak i prézant byin, rod pa bizou an or, an arzan, non, i sifi dé-troi kolifisé, mon fonm i di « pacoti », pèrl, mé artifisyèl, pétèt an plastik, mé li briy, li lé amaré konm in vré kolyé, in vré braslé, ti vé war lo boukzorey ?
Pa sèr madam, pa sèr mésyé, alé of a ou inn ti kado po Noèl.
Là li angant a ou, toulmoun i asèt, ti vé pa èt moin k’ton voizin, toué lé tanté fé konm tout domoun, somanké ton bann zanfan la fine domandé.
Dan in péi nana tou sa somèr, ti salèr — grévis —, mi trouv in sèrtin insolans la sosyété ékspoz ankor zafèr initil, zist po fé révé, ardone a toué in konplèks. Sé in provokasyon, in blésir, inn soufrans.
La sosyété lé inzis, si li mèt an lèr o soley lo marsandiz, in sosyété byin réglé i devré done tout domoun lo pouvoir asté !
Sé sa tromatism… pa po toulmoun, périod la fèt larivé !

 Justin 


Kanalreunion.com