Oté

« Pèrsone i koné pa si in moun i sort loin néna la ké ! »

In kozman pou la rout

Justin / 22 out 2016

Sa sé in n’afèr lé bien vré. Ou va konète in moun la grandi korté ou ; va konète son kalité épi son défo. Mé si in moun i sort loin i ariv dann out l’androi, ou i koné pa arien dsi li. Lo moun l’androi l ékonm ou. Ignor si sé in bon sansa in mové moun, si li ana sinonsa si li la poin in tar i rann ali infrékantab. Moin pèrsonèl, moin la fine fé l’éspèryans demoun i koz gra, i prétan zot la fé si é zot la fé la, mé boudikont la poin pèrsone pou dir si lé vré sansa si lé fo. Na in provèrb fransé i di pa : in moun i sort loin i pé manti konm li vé ? (a bo mantir ki k’i sort loin !). Si li néna la ké, pèrsone i koné pa ! Si li sé manèv gran-dyab i koné pa non pli. Alé ! Mi lès azot fé trabvaye z’ot koko la dsi é ni artrouv pli loin.

NB I paré kan la guèr l’alzéri la fini konm in bonpé z’arshiv lété brilé na d’moun la trouv azot tout sort kalité gran diplom. Vré ? Pa vré ? Mantèr ? Mi lès azot oir par zot mèm.


Kanalreunion.com