Oté

Pétaz de kab, rashaj de kro, koupaj de tète é konpagni

Justin / 21 zwin 2010

D’apré sak mi antann… solon sak bann éspésyalis i di dann télé : an parmi bann jouar, nana bann bon jouar an France. Solman, in pé i di ossi na poin in gran lékip. Lé vré ? Lé pa vré ? Sa mi koné pa. Sak moin lé sir, sé k’dépi in pé d’tan, lékip la France na poin bon rézilta. Akoz sa ? Moin pèrsonèl, mi koné pa, mi akoute bann komantézèr. Pou zot, la pa gingn fé in bon lékip, épi zordi, konm k’i diré, sé in gato mal kui.
Ala éstèr, toulmoun i fé lo doktèr, i rode bann sign la maladi… lo romède ziska ! Lé in pé tar, mèm si la pankor fini san pour san. Domin, lé shoz sar bouklé. L’èr-la nou va oir... An atandan, in pé i pans ziska, lo lantrénèr avèk lo bann jouar, i rèss azot aryink pou alé bordmèr épi vèy la sétyème lam, pou tir la shyass.
L’èr-la, banna l’a rash lo kro Anelka, pars li la pète in kab... In késtyon ? So rashaj-de-kro va guéri lo l’ékip, sansa va rann ali pli malad ? Va fé in gran shok, sansa non ? Va amène in rémissyon, sansa non ? Zanbash, mon méyèr dalon, i di amoin lé pa pou sa ké la fé sa ? Pars lo lantrénèr na son résponsabilité... lo prézidan lo foutbal lé pa blan konm linj blan. La ministrèz i égaliz èk èl-mèm. Mé banna sé moun byin, moun byin konsidéré dan la politik, bann moun pa pèrdi pou la sosyété. Tanka lo marmay révolté, i pé koup son tète san danzé.

Justin


Kanalreunion.com