Oté

Pétèt banna i vé travayèr i kay dovan patron ?

Justin / 13 zanvié 2016

In nafèr la éspass la ba déor dopi wuit an, dann in lizinn la rou, fin d’kont in lizinn pou fé la rou loto, katèrpilar, tousala. Boudikont lariv in ralé pousé rant travayèr èk patron, konm i pé arivé tanzantan dann in lantropriz, i pé arivé souvan-dé-fwa dann in lantropriz ousa na pwin tro dialog sosyal, ousa na pwin sindikat osi, ousa lo patron i désid sontousèl pli souvan. Lo san la shof in pé, la pa tié personn, mé dizon bann travayèr la bourad in pé lo patron.

Pou sa wuit an apré, wuit travayèr la pass tribinal pou réponn pou kosa. I prétan tribinal la défoul la d’si, pou awar sékéstré inn ti néstan dé kad, lo tribinal la donn shakinn nèf mwa prizon fèrm. Parl pi si néna lé bazourdi, parl pi si i rèt an travèr gozier in pé. Lèrk zot la antandi sa i prétan zot san la kayé. Tribinal la in pé abizé i di, promié fwa dann travay, tribinal i pran in désizion konm sa.

Lé in pé gosh solman, konm i di, banna i sava anfèrm domoun ki té i vé zis sov lanplwa dan lantropriz, minm si, zot i rokoné zot minm, pétèt i mérit inn ti sanksyon, mé, alé an prizon pou sa, i rosanm plito in réstranki pou banna, In fasson pou di konm sa, pou prévni a zot, koméla, i mèt pa lo dwa sou lo né in patron, sinonsa antansyon. Pétèt minm banna i vé travayèr i kay dovan patron !


Kanalreunion.com