Oté

Pétèt zis in késtyon divèrs ? mi pans pa kant mèm !

Justin / 23 novanm 2011

Nana dmoun nana solisyon pou tout z’afèr. Sé zot k’i di touléka. Sé zot k’i di dann radyo, é fason zot i di, ou na l’inprésyon sak i pans pa konm zot la tyé kouyon pou pran son plas. Sa lé vré pou bann problèm grav konm pou sak lé moin grav. Dépi dé-troi zour, dan bann radyo i parl in bonpé dsi la vyolans kont bann madam par zot bononm, sansa par in l’ansien, in l’« ex » konm désèrtin i di pou fèr bien. In pé i di i fo mèt bann bononm vyolan dan la prizon pou lo réstann zot vi. Néna d’ot i di konmsa i fo ardonn favèr la pèn de mor. In pé mèm i mazine i fo fé travay demoun dann shantyé travay forsé. Moin na in dalon i pans ziska k’i fo donn mové manzé dan la prizon épi fé travay demoun dann z’épine pagote, dann solèy, é mèm vèrs siro a-tèr konmsa fourmi i défrish lo kriminèl.
Moin personnel, mi pans la fine ésèy in pé tout solisyon san trouv lo vré. Sa i vé pa dir i fo pa rodé ankor in pé plis, késtyonnn diminyé i pé la vyolans kont bann madam. Rodé, oui ! Mé rode koué ? Mé rode ousa ? Sa in késtyon lé bien difisil. Nou lé dan in sosyété lé miné par la vyolans. Nou ? Pa solman nou, Rényoné, vi k’sa lé vré pou in pé tout sosyété dan tout péi. Nou lé miné par la vyolans, épi konm in pé i di, nou lé malad èk la vyolans. Moin na poin arienk dé zour dsi mon tèt, mé moin la touzour tandi anparl la vyolans dan bann famiy. In pé i di : "Ou la fé out vin, donk i fo boir !". D’ot i di : "Ou lé maryé pou lo méyèr é pou lo pir ; sé in drol z’afèr antann dir kékshoz konmsa. In pé d’moun bonn volonté i roganiz bann marsh blansh, mé ou i antan pliz’anplis in marsh blansh i ansèrv de riyin.
Kosa i ansèrv kékshoz alor ? Biensir, moin na poin la solisyon, pars si moin l’avé, moin nora pa kontant ékri mon pti modékri, moin nora fé d’ot shoz.
I paré la-ba l’Amérik, in pé savan l’apré shèrch in solisyon pou siprim lo jèn la vyolans dan kor d’moun... I prétan mèm in pé i vé alé rod an parmi bann marmay kisa lé riskab èt vyolan in zour. Séryé, i fé z’étide la dsi ! Aprésa, kosa va fé ansanm, sa mi koné pa.
Lé ga, san alé rod midi a katorz èr, zordi mi domann amoin pou kosa na poin in loi kad la-dsi konm madam Bello la fine propozé ? Pétèt pars, pou nout bann gouvèrnan, sa la pa in késtyon i konsèrn l’intéré nasyonal, pétèt zis in késtyon divèrs ? Mi pans pa kant mèm !

Justin


Kanalreunion.com