Oté

Piss dann vyolon pou tir in son !

Témoignages.re / 24 février 2010

Matante Zélida la ékrir Justin :

Mon shèr nové, mon spès salté,
Lé vré zot i doi an avoir l’abitide bann moun i sorte déor i pass lo tan pou flate program dévlopman dirab la Réjyon. Dé sèrtène foi i di konmsa, La Rényon i pé ansèrv modèl pou bann réjyon la Frans. Dé sèrtène foi, zot — bann rouj de fon ! — lé fyèr rakont tèl komine, tèl l’antropriz la gingn in dékorasyon. Mi san out shoviy l’apré gonflé la ! Mé pa bézoin fèr la bou avan la plui, pars in vré lékolozis, in sèrtin Jean-Marc Brulé, la vni asézone azot. Oté ! la sort azot in shaplé d’armontrans pou dir azot, program ékolozis la Réjyon la pa ékolozis ditou, la di zot sé in bann fo-né lékolozi. Tok ! Pran sa pou toi !

Justin la fé pou répons :

Mon pov vyé matante k’i koz touzour la boush rouvèr,
Moin la lir zournal konm ou, moin la byin konpri sak li la rakonté... mé solman, bann moun i vyinn sorte la Frans épi i vyin done anou lésson-la, la pa moin va tonm déssi la pate dovan zot konm poul dann poulayé. Dabor inn, mi pans mèm pa li koné pou vréman nout program… arzoute èk sa, mi oi déssi la list l’Alyans nana o moin dé dirizan ékolozis la larg la list ofisyèl, donk nomé par Paris... A ! la bénédiksyon lo gran-frèr d’la Frans. Mi pans zot o-moin, zot i koné bilan La Rényon dann dévlopman dirab, i koné ossi lo plan pou l’énèrzi prop… i koné galman projé tram-train. Alors sak lo méssyé Brulé la vni dir issi, mi pans li la armène sa dann son balo l’androi li sort. Dizon, konm di lo kont, li la vni « piss dann vyolon pou tir in son »… é pa pliské sa !

 Justin 


Kanalreunion.com