Oté

Plantèr, izinyé : Sa la pa in komansman dézorde sa ?

Justin / 27 juillet 2010

Mi sort antann dann télé, lo reprézantan bann sukriyé di in n’afèr a pépré konmsa : konm li ashète lo kann, lé normal li vérifyé la kalité. Lé normal lo l’ashtèr i vérifyé la kalité la marshandiz ! Aryink sa mèm ! La, i parl pi d’parténarya, la la pi aryin pou di déssi l’intèrproféssyon, la nana aryin in vandèr, lo plantèr, épi in l’ashtèr, lo sikriyé. Bann plantèr, pou zot par, i di nana in n’afèr i apèl le sant téknik(ctics)… nana ossi la komissyon miks dann shak l’izine. Donk, kossa i ansèrv bann gardyin l’izinyé i mète pou sirvèy koman k’lé shoz i éspass ?
Dizon, nana in dézakor… dizon ké lo kontrol lé pa sifizan... l’èr-la nana in désizyon pou prann ansanm pou toute bann z’aktèr an avoir satisfaksyon. Mé la pa bon, konm bann sikriyé i fé, pars ni vé, ni vé pa, li shèrsh moiyin mète lo plantèr dann la difikilté, li mète lo plantèr épi lo sant téknik(ctics) sou son sirvéyans.
Pou kossa bann sikriyé i lèv la guèr konmsa ? Sanm pou moin, dann zot tète, la dominasyon post-kolonyal la pankor fini. La prèv ? Vi ké Tereos i di k’li sé in kopérativ, akoz li la pa propoz bann plantèr an avoir zot ossi zot par la-dan ? Akoz zordi li di li sé in ashtèr é lo plantèr lo vandèr ? Arzoute èk sa ké zot la poin l’intansyon mète an valèr toute bann sou-produi la kane. Solman li krash pa dsi toute progré bann Rényoné la fine fé, dann lésploitasyon kann, par lo santr roshèrsh.
Sa la pa in komansman dézord sa ?

Justin


Kanalreunion.com