Oté

Pli pir zot la fine fé pti !

Justin / 1er février 2010

Méssyé Préfé i sava. Avann alé, li la fé in konférans dé prèss pou di… sak li la di… anfin, mi pans, in pé la di tir z’ot moushoir. Tan-myé pou zot ! Byin antandi, mi pé kontinyé plézanté la-dsi, mé la pa tout z’afèr lé bon pou plézanté. Kossa ? Par égzanp kan in bann kamyonèr la blok la Réjyon par dé foi, avèk la bénédiksyon lo roprézantan l’Éta — l’Éta lokal, konm lo prézidan i di sa ! Par égzanp ankor kan bann pankart la moukate bann z’éli épi sa la rèss la kan promyé minis l’arivé é kan li la roparti. Arzoute ankor èk sa sak i éspas koméla pou sèy bate Konsèy zénéral a-tèr. Alon pa oubli l’anilasyon, san rézon, kat zéléksyon. Armète avèk sa lo parti-pri bann gran médya... moin la vi avèk mon dé zyé in zournalist RFO arète filmé kan prézidan la Réjyon la komans son diskour, é pa aryink in foi siouplé !
Kossa préfé, épi tribinal, épi ankor bann médya noré di é noré fé si bann konplotèr l’avé ariv anpèsh Konsèy réjyonal épi Konsèy zénéral mars konm k’i fo ? Kossa zot noré fé é kossa zot noré di si gouvèrnman l’avé profite so l’okazyon pou déside disoude bann z’asanblé lokal konm la fé èk bann komine dann tan Perreau-Pradier ? Mi pans, méssyé préfé nora pa mank fé in propozisyon pou sa ! Mi koné sa par avans pars mi koné sak la fé dann passé... épi pars dépi tan-la, bann z’ènmi la démokrasi épi la libèrté olèrk diminyé... konm di kréol, zot la fine fé pti.

Justin


Kanalreunion.com