Oté

Pli tar va rokonète ou na rézon

Justin / 21 septembre 2009

Issi, konm partou, na d’moun na in l’idé dann z’ot tète, épi i tir pa. Na d’ote i shanz l’idé shak instan, i shanj sa konm i shanj linj... Promyé kalité, kan la déside fé in l’antropriz, i fé… Dézyèm kalité, i fé pa aryin, pars lo tan li l’a fine kalkilé pou fé in n’afèr, ala k’ li trouv in méyèr kékshoz pou fé. Toulfasson, shakinn son afèr, shakinn son déstin, sétaki i amenn son bato konm li konpran.
Sa lé vré pou in n’afèr pèrsonèl mé i doi pa ète vré kan ou i okip in projé piblik. Mé i pé mèm pa ète vré. Pou kossa ? Pars i fo ou i rode l’arzan pou fé out prozé, i fo ou i fé voté kisoi par konsèy minisipal, konsèy zénéral, konsèy rézyonal épi d’ote ankor... I fo ou i mark sa dann in bidzé é ou i pé pi toush so larzan, sof pou lo zafèr la déside fé. Fé vote in bidzé, épi dépans larzan dann in n’ote, sa sé in n’afèr i fo pa fé. A moins ké ou i vé alé pass in pé d’tan la jol lo Por, Dominzo, sansa Sin-Pyèr. In tan, mi ansouvyin, inn-dé moun gabyé, l’avé kalkil mète larzan la MCUR dann la route an kornish, sansa mète larzan tram-train dann route an kornish épi vèrsi-vèrsa. I pé dir, zot lé éskizab, si zot i koné pa so bann règ-la. Si zot i koné, zot sé in bann manipilatèr, bon solman pou roul demoun dann la farine. I paré, kan zot l’avé in pti pouvoir zot té i fé konmsa, mé la zistis téi toush pa zot pars zot lé dann lo bon parti, parti la droite.
Sèl z’afèr i pé dir, i fo ou i kalkil byin avan fé in n’afèr, ou i fé ède aou pou kalkilé, mé kan ou la fine mète in train déssi lo raye, i ansèrv a riyin, fé déraye so train-la...
Kan in koléktivié la déside mète anlèr in bann projé, byin kalkilé, byin inportan pou noute péi épi noute pèp, i fo marsh déssi é pa shanj l’idé, kontinyé son shomin mèm si bann kriyèr d’nuite i fé toute pou anbaré. Pli tar va rokonète ou n’a rézon…

Justin


Kanalreunion.com