Oté

Plis k’in lérèr, in fote grav kont La Rényon !

Justin / 15 mai 2010

Dan la Frans la-ba, na in gran vil i apèl Bordeaux. Son mèr, in moun koni, vi k’sé méssyé Juppé, minis dann tan Jaques Chirac. Zot i koné kossa l’ariv ali dann tan li lété adzoin mèr dan la vil Paris ? Pandan in bon koup de tan, li la pèrde tout son bann manda d’zéli... épi li la rovni é bann demoun la ardonn ali la plass mèr…, é li la komanss transform lo vil.
An byin ? An mal ? Sa mi koné pa pou toute z’afèr, épi dizon sa i rogarde pa moin pou vréman... moin la pa in Bordélé, moin sé in pti kolon La Rényon.
Sak mi koné, sék’an mil-nèf-san sinkant-uit, in l’ansyin mèr la démonte lo tramway. Juppé, pou son par, la déside rofé lo tram… romète lo ray. Zordi nana troi lign lo tram, déssi in longuèr karant-kat kilomète, é i transporte san soisann sink mil pèrsone dann in zourné. Sa i aranz byin la vi bann moun i sava travay, sansa fé z’ot komisyon, ou sinonsa ankor proméné. Sa i pèrmète lo vil pa tonm dann koma sirkilatoir.
Par l’fète, zot i koné lo parti boug-la ? Zot i koné son koulèr politik ? Di pa moin zot i koné pa ! Di pa moin zot ignor sé in moun l’UMP, mèm parti ké Sarkozy, mèm parti ké kisa ankor ? Didier Robert, si mi tronp pa... poitan, sète-la, lé pa tro désidé fé nout tram-train. Poitan, sète-la i pran lo risk fé tonm nout sirkilasyon dann koma, prèss konm la komine Tampon. Alor, lé ga, lo tram in pé partou dan la Frans, é pou nou la route, la route, ankor la route. Mèm parti, mèm politik soi-dizan, épi dé désizyon i sava pa dann mèm sans. Dizon, la na plisk’in lérèr, na in fote grav kont La Rényon !

Justin


Kanalreunion.com