Oté

Plis san rakontèr zistoir :
 Oté ! Ala pa k’ni bouz ankor !

Justin / 27 zwiyé 2009

Daye, daryon, sirandane, kanpèsh, zistoir kréol ? La krosh, zé d’toupi, zé la rou loto, zé d’sèrkl, zé la roulette flèr d’kane ? Séga, maloya, mazirka, java étsétéra ?
Moin lé sir zot i pans té sa la vi bann demoun lontan ! Moin lé sir zot i mazine l’ané mil-nèf san sinkante, par-la, té la fasson viv, la fasson amizé, bann moun dann tan-la. Par l’fète, mi diré pa zot la tor, mé mi diré pa non pli zot la rézon.

Si zot i di bann demoun té i fé bann z’afèr-la, té i okip z’ot tan konmsa, sa lé vré é zot la rézon. Mèm moin lé paré pou tir mon shapo dovan zot.
Mé si zot i pans, dann z’ote fonn kèr, demoun lavé konsidérassyon pou sa, moin lé paré pou dir azot : zot i tronp, zot i fé in lérèr.

Pou kossa ? Pars la kilktir ofisyèl té fine lans la guèr, té fine déklansh l’assaut kont nout prop kiltir é in for travay pou nout l’alyénassyon lété fine komansé.
Déza, in pé té i di, i fo fiziy lo kréol ! Kiltir kréol, sa i égzis pa ! Lo pèp rényoné, parl pa zot de sa ! Listoir La Rényon, ki fouti listoir ! Bann zé la rou loto ? Bann zé d’toupi ? Zot i oi pa sa lé fini, sa i sava mor, vik bann zé valab té i sort la-ba dan la Frans épi i pran toute la plass.

Alé savoir koman tousala la ardrèss la tète : koman bann zistoir, bann sirandane, parol séga, parol maloya la nyabou pou sorte dann roulo-konpréssèr, koman la vnyabou arfé-viv la krosh, moring ; armète anlèr bann zé té i zoué lontan. Koman la oz apèl sa la kiltir rényonèz ? Nout kiltir rényonèz !

M’a dir azot in n’afèr : mi sort assist, dann konsèrvatoir la ri d’ Paris, in romiz-diplome pou bann rakontèr zistoir : vinn-sink rakontèr zistoir. La pa inn, la pa dé, mé nana déza plis san rakontèr zistoir dan toute La Rényon. Oté ! Ala pa k’ni bouz ankor !

Justin


Kanalreunion.com