Oté

Plito k’ète minis, mi préfèr éte kominis

Justin / 9 séptanm 2016

Moin lé sir in pé va di : « Oté ! Justin-la, ou lé zalou koman don ? ». Alor pars gouvèrnman la shoizi in rényonèz pou ète minis, ou la bézoin kritiké. Ou la bézoin rabès nout ti Erika ? in z’anfan la kour ? In z’anfan La Rényon ? La fé in parkour vèy pa koman dann la politik ! La i oi out mové fon la !

Poitan la pa in kritik, sé zis in réflèksyon pou moin mèm é pou lo moun mi koné. Pou kosa ? Pars la vi l’ amenn amoin a trouv in bonpé d’moun é anparmi in bonpé kamarad kominis. Mi koné in pti myète sak zot la fé dann malizé sirtou. Pou kosa in pti myète ? Pars in bonpé d’zané nou la viv dan la klandéstinité é sé la-dan nou la fasone nout karaktèr, nout métod, nout l’abitid. Tout sak, konm moin, l’amenn in bon morso z’ot vi dann nout parti i konpran sak mi vé dir.

Mé la pa tousala-san fé vantar ! Mi pans sé dann nout parti ké moin la konprann in paké z’afèr dsi la vi bann pèp, dsi l’ésploitasyon zot la sibi, é dsi zot konba pou sèy libèr azot la gangrène kololyal. Si zordi, nout parti i déklar nou la pa dékolinizé pou vréman, nou konm bann l’ansien koloni fransèz in pé partou dsi la tèr sé par l’analiz, sé oar la réfléksyon améné dopi d é z’ané é dé z’ané. Par l’fète mi rogrète nout bann z’analiz lé pa asé partazé.

Ni koné lo kozman José Marti, in gran cubain téi di : « Moin la viv dann kèr lo monstré é mi koné son z’antraye mé mon flèsh lé konm sète David ! ». Sé dann kèr lo monstré ké nout pèp i viv dopi dé z’ané é dé z’ané. San alé pli loin, m’a dir azot mi prèfèr oir klèr ké an avoir lé zyé boushé. Mi mépriz pa pèrsone pars mi koné dann shakinn nana in talan mé mi koné osi in talan sa i pé z’ète détourné. In mové dépar é sé in l’arivé gaté ! Sé pou sa mi di é pa pou d’ot rézon é… pars tazantan i fo fé ri in pé la boush mon bann dalon léktèr : « Plito k’ète minis mi préfèr éte kominis ! ». Alon di partou !


Kanalreunion.com