Oté

Plito k’sé zot k’i raz anou a-sèk, myé vo sé nou k’i raz azot !

Justin / 26 séptanm 2011

Na dé-troi zour, in sèrtin Michel Vergoz la réponn in zournalis dési la késtyonn RSA gouvernman l’UMP i vé modifyé. Li la di apopré, tan myé pars li la zamé kroir dan lo RSA... aprésa, li l’azout, avèk prozé sosyalis, na moiyin donn travay in bon pé d’moun ; Alé savoir pou koué ! Mi koné pa si li l’avé konésans lo prozé la droite : si li té i koné pa, pardon éskiz, mé bann Rényoné pov lé mal parti avèk li. Si li té i koné, sa i prouv in foi an plis ké la droite avèk li, li avèk la droite, sé konm blan boné épi boné blan.

Pars prozé la droite lé vréman mové pou nou. Dabor inn, i di konmsa RSA sar valab pou sis moi é apré va ronouvèl in kou solman. Zot i koné nana in gran kantité d’moun i gingn lo RSA. Kan mi di in bon pé d’moun, i vé dir plizyèr dizène milyé d’moun. Donk si i done pou sis moi, épi si i ronouvèl in kou solman, kosa va fé kan lo dézyèm sis moi va fini ? Kosa demoun va manzé ? Tousa va domann siouplé papa-momon, sansa la Kroi Rouz épi d’ot ankor. Sar pi la povrété, sar pi la mizèr, sar la mizèr noir.

Aprésa, i di bann nana lo RSA sar blizé travay douz-èr d’tan dan lo moi. Mé kisa va donn azot so douz-èr d’tan la ? Mi oi pa ! Konm mi oi pa lo prozé sosyalis donn travay in kantité milyé d’moun. Promète i pé touzour, mé réspèk lo promès, sa lé bien rar. RMI lété pa tro vayan, la ranplas par RSA, mé RSA lé pa vayan non pli. L’èr-la, sanm pou moin, gouvernman i rode raz anou a-sèk. Mi pans, i vo myé sé nou k’i raz azot a-sèk avan…, kan v’ariv dis mai 2012.

 Justin 


Kanalreunion.com