Oté

Plito ké di, zot i èm anou ! Mi préfèr i rokonè nout droi

Justin / 5 septembre 2011

Nana lontan bann gran vaza i sort la Frans i vien dir anou zot i èm anou. Sa sé in n’afèr lé pétète vré, mé moin pèrsonèl sa la pa in n’afèr i intérès amoin pou vréman. Dabor, zot i di, zot i èm La Rényon, mé kèl Rényon zot i èm : La Rényon k’ i rézist ou bien sète ’i marsh a-jnou ? La Rényon bann profitèr ou bien sète bann ti kolon ? Sète i rovandik son passé ou bien sète i vé pi konète sa ? La Rényon k’i réklame lo moiyin pou li dévlopé, ou bien sète i domann anou pou partisip l’éfor lo soi-dizan solidarité UMP ?

Pars nana dé shoz pou dir la-dan.

Zot i èm la Frans zot ? Moin lé sir, shakinn rantre nou i èm la Frans, mé lakèl ? La Frans bann droi de l’om sansa sète bann guèr kolonyal ? La Frans lo CAC-40 ou bien La Frans bann travayèr ? La Frans i mète bann Rom déor dann "wagon plonbé" ou sinonsa sèk i koné rouv son bra pou akèy bann réfijyé ? La Frans, sak lé ramassé déssi li-mèm par pèr l’avnir sansa sète i rolèv la tète ?

L’èr-la kan in minis i vien épi li larg anou in kozman zénéral, konm sak moin la di pou komansé, i fo ni kalkil kèl koté La Rényon li èm, kèl koté li èm pa, myé k’sa, kèl koté La Rényon li lé. Sa lé vré mèm si lo moun la pa in minis. La prèv ? Méssyé Delanoé, i sort vni vizite anou. Moin lé sir, li la vni issi konm mèr la kapital La Frans, konm militan parti sosyalis, konm in gran pèrsonaz ké li lé, épi an tan k’pèrsone mi koné pa ditou. Dakor ! Mé li vien dir anou, Paris i èm La Rényon ! L’èr-la moin mi arvir ali, kèl Paris i èm kèl Rényon ? Mi sar pa rokomans mon rofrin bien antandi.

Mé, plito ké di zot i èm anou, moin pèrsonèl, mi profèr i rokoné nout droi, tout nout droi…

Justin


Kanalreunion.com