Oté

Plonbaz lo dan danzéré, antansion la maladi !

Justin / 27 févrié 2015

Mèrkrodi gran matin dsi l’kou d’ troizèr, moin té apré rogard la télé. Pars si zot i vé gard in bon zafèr dann télé i fo agard lé zèr zindi, pars in l’èr normal ou i risk pa oir in n’afèr sèryé. Anfin, mi pans moin la louk in n’afèr séryé. Kosa i lé ? A s’ki paré mèrkir i zoué in mové rol dann nout santé.

Mèrkir, kosa i lé ? Sa in drol métal vi k’li sé in likid soman li pèz son poi (plis trèz kilo lo lite). Ousa li lé ? In pé partou. Dann tib néon, konm dann bann lanp lékonomi l’énèrzi. Dann bann produi pou la boté, kisoi krinm, kisoi lo far, kisoi ankor tout kalité kataplas i mète dsi lo figuir. Nana osi dann plonbaz lo dan : i apèl plonbaz mé na pi lo plon la-dan, pars sé in l’amalgam avèk plizyèr métal mé près sinkant pour san mérkir.

Mèrkir lé danzéré, pars d’apré sak moin la antann, sa i donn in bonpé maladi. Nana in pé i apèl ali lo tièr vintéinième syèk. Konm moin la di sa nana dann plonbaj lo dan épizapré kan ou i mash singom, kan ou i boir dolo ou i dépass la doz otorizé é sa i mine aou : fatig-li, doulèr-li, fonn shagrin li, mèm i pous aou dann l’alzémèr. Solman, antansion nana d’ot produi pou ranplasé mé lé shèr é i paré bann dantis i signal pa tro, ou alor si i signal, demoun i konpran pa tro é i domann lo moin shèr.
Donk, sa in n’afèr i fo pran prékosion, i gingn pétète pa s’an pasé, mé i fo pa an abizé. Konm in vyé shanson dsi la polio té I di :”sé in maladi d’la po, maladi d’ la trip, maladi d’ la tète.

NB. Alé rod dann zot motèr d’roshèrch mi pé dir azot zot va tonm asiz… ». Si inn parmi nout bann dépité i vé travay la dsi li pé zoué in bon rol.


Kanalreunion.com