Oté

Po d’shanm pou pla kouvèr, makaroni pou la bouji !

Justin / 5 févrié 2013

Tout demoun in pé normal i pans, fé in dépans sink-san mil éro pou répar in radié épi k’lo radié i dégrèn mèm pa in moi apré lé pa vréman rézonab. Mié k’sa, zot i pans, arlans in nouvo radié, ki sar kout dé mil é dé san dan la périod siklone, lé ankor pli dérézonab. Sa sé in fasonn oir lé shoz pou bann moun nana konm ki diré in pé lo plon dan la tèt. Mi koné pa kosa, pèrsonèlman, zot i pans, mé moin mi kroi i fo bien kalkilé avann fé in gro dépans l’arzan piblik konm sa.

Pou kosa i fo kalkilé ? Promié rézon, l’arzan an kantité konm sa i trouv pa sou la pat shoval, é mi kroi pa in pèrsone konm Paul Vergès, sansa d’ot gran prézidan Konsèy réjional, nora lans ali la tèt bésé dann in n’afèr konm sa. Dézièm rézon : oplis lo tan i pas, oplis bann z’injénièr i roshèrch, i fé progré. Zot na l’èy in pé partou, é zot i shèrch in manièr pou fé in n’afèr pli solid, é si posib dépans moins l’arzan. Promié radié la fé nana plis katr-an é la tienbo ziska zanvié sèt ané. Dézièm radié la pa tienbo in moi. Zot i pans pa na konm in n’afèr pa normal ? In n’ot rézon, sé ké Konsèy réjional na in trézor la gèr i fo dépans ali ou sinonsa l’arzan zété la pa zété pou toulmoun. Sé sak demoun i di, é moin mi vann konm moin l’ashté, konm diré l’ot SGDG — san garanti par lo gouvèrnman.

I paré ké non. I paré ké nou, bann ti kolon, ni konpran pa arien. Touléka, sé sak moin la konprann an rogardan dé gro mésié apré koz dann télé dimansh o soir. Pars, d’apré sak zot té i di, lo radié té fé éspré pou pa èt solid. Pars si li té fé pou èt solid, akoz nora pa fé in pon ? L’èr-la, mon l’éspri lé in pé anbrouyé. Ziska zordi, moin té i pans, té i fé radié é té i fé pa lo pon pars lo pon lé shèr é radié méyèr marshé. Poitan, radié lé asé solid. Dolo i mont dési, mé i kas pa li par bout. Sa lé vré pou Sint-Sizane, sa lé vré pou radié Gillot, sa lé vré pou bann radié dann sid, dan l’èst, é pi dan l’ouès. Donk, pou moin, in radié i pé èt solid ! Bin alor, pou kosa sèt Ouaki é sèt la rivièr Sint-Etienne i kas konm sa, an vitès ?

Inn an parmi lé dé mésié la di : "Nou la joué par malshans !". Oté, sa la pa in jé ! I zoué pa èk l’arzan Kréol. Si lété lé vot, ou nora zoué avèk konm sa ? Amoins ké lé dé gro mésié i kroi nou lé boushé vèy pa koman, é sa i déranj pa zot fé prann anou ankor in pé plis po d’shanm pou pla kouvèr, sansa makaroni pou la bouji.

NB : Lé ga, zot i oi in kou moi d’mars, lo nouvo radié i sava dan la ravine pars na in nouvo siklone... mi atann lo bann sharjèr d’lo. Na oir kosa i sava rakont anou ankor konm mansonjri.

 Justin 


Kanalreunion.com