Oté

Poin 20 program parti kominis ? Nou la pa zanfan batar !

Justin / 23 novanm 2015

Zot va dir mi radot. Zot va dir mi rabash. Zot va dir moin l’apré toultan anparl la mèm shoz. Kosa i lé so shoz-la ? Sa in poin, mi trouv lé inportan dann program parti kominis sé sak i apèl l’otosifizans alimantèr. Osinonsa réponn la késtyon : In péi konm La Rényon – mé sa lé vré pou tout z’il l’oséan indien dan no z’alantour, i pé, sansa i pé pa asir son nésésèr késtyonn manzé ? Donk produir sak i fo pou nouri son popilasyon ? Sa in gran késtyon sa, pars solon ou i réponn par oui, osinonsa par non, nana tout in éstratézi pou trap lo poinn-vizé.

Na poin lontan moin la anparl de ri é moin la di, pars lé vré, ni manz dori, lo onzèr konm lo soir tout l’ané é ni pans ni pé pa s’an pasé. Biensir i fo pa s’an pasé pars sé in bon nouritir. Sak i f osé ésay oir sinout avnir lé asiré, si par ébzanp in zour bann péi i vann anou dori i désid pa arète ésporté pars zot na pi pou zot an sifizans. Na dé-troi z’an, si mi tronp pa, bann z’indien la désid arète ésport z’ot ri basmati. Sa la pa dir lontan mé kant mèm sa i doi z’ète in alèrt po nou.

Tout fason i fo sirtou pa atann nou na pi pou séy konète koman i produi. Sé pou sa, moin pèrsonèl mi èmré i komans san tardé étidyé la plantasyon d’ri bio isi dann la Rényon. Mi èmré bien bann kandida zéléksyon réjyonal i mète sa dann z’ot program, i ède bann shèrchèr pou travay la dsi. Konm di lo kont, sak lé posib Madégaskar, dann l’afrik, dann vietnam épi dann d’ot péi, lé posb isi osi. Nou lé kapab ! Konm té i di défin Madoré, nou la pa z’anfan batar !

NB Ni pé oir lé shoz suivan nout poinn vizé pèrsonèl-in pé i di sa lé nonbrilist-, ni pé oir osi lé shoz solon in éstratézi d’ko-dévlopman.



Inn modékri, inn ti lavi, inn komantèr ?



Bann modékri andann forom






  • lotosifizans alimanter, nout pei i fé apa lékonomi dé réflesyion an évitan so kestion. domin i komans zordi, é kan nou koné toutlorota k’i konsern not devlopman, é byen i fo nou donn à nou la min pou mett nout pei alabri dé zaleas é sirtou prépar la Rényion o milyion zarbitan. koman nou fé ? noutout na in bout lo répons ! é lé réjyional i pé donn in sinyal for dann so diréktion , é byen sir i fo nou kontinié à travayer pou aksélèr lo mouvman !
    Nou kroi an nout péi, nou néna konfians dann nout kapasité pou son devlopman, nou lé dsi lo mem bato, alon ansamb soubatt pou fé avans la Rényion.

    Article
    Inn modékri, inn ti lavi, inn komantèr ?


Kanalreunion.com