Oté

Poison i komans pouri par la tèt !

Justin / 19 avril 2013

Zot i koné lo FMI ? Sa i vé dir Fon monétèr internasional. Sa in n’afèr na poin in bon répitasion, pars li anprèt l’arzan bann péi, mé li oblij bann gouvèrnman fé in politik zot pèp i vé pa souvan dé foi. Lo FMI la parti maye son né dann z’afèr la Grès, dann ménaj Portigal ; li la parti okip bann z’Italien, é na poin lontan, li la vol o sokour bann bank in péi i apèl Chipr. Mi sort lir, so kou isi, avèk son bann konplis, li sava o shové la Slovéni. Sa la pa in bon sign ditou kan i oi banna débarké.

Rozman, li osi, li na son shoviy an arzil. Li osi nana vèr dann frui... Na dé foi, sa i provien par lo moun lé bonbardé diréktèr. Zot i souvien DSK ? Sa Sarkozy la anvoy ali la-ba, pars in pèrl parèy té i pé pa rès arienk dan la Frans. Té i falé done ali l’okazion égzèrs son talan in pé partou, sirtou dann kèr l’Amérik. Zot i koné kosa l’arivé, ou sinonsa, konm moin mèm, zot i koné pa bien. La tèlman antour ali avèk in bann konplo é li té si tèlman san méfians ké li la fini par démisioné, épi lo rès la pa bézoin ni insist dési.

Kan li té fini démisioné, Sarkozy la pous madam Lagard pou pran la rolèv. Té pi in diréktèr, té in diréktèz. Pou èt dan la lign, èl té dan la lign ; bann kapitalis l’avé poin arien pou an avoir pèr avèk èl. Tout té i roul ron é lo fitir té san niaz. Mé ala pa k’in ziz la Frans na konm in anvi alé rod lo pou dan son tèt. Ala soupson i pèz dsi èl. Ala k’in pé i di, èl la fé gingn Tapie plis kat san milion l’éro, san difikilté. Ala, paré t’il, lo kour Zistis la Répiblik i sava konvok ali. Sirman pa pou très in marlé flèr pou li.

Konm in vié kamarad té i di, é mi pans lé vré, "Poison i komans pouri par la tèt !". 

Justin


Kanalreunion.com