Oté

Portré, mode People ! People péi, si zot i vé !

Justin / 28 novanm 2014

Moin la toujour antann dir in pti n’instan dann télé sa i kout shèr. konbien ojis, mi koné pa é fransh vérité sa la pa in n’afèr i anpèsh amoin dormir. Sèl z’afèr mi pans, kan mi trouv in kékshoz la pa bézoin pass dann télé, mi di dann mon kèr « Pou kosa i gaspiy larzan konmsa ? ». Lé vré pou bann télé isi, lé vré galman pou bann télé déor, mé si sa i intérès demoun, tan myé ! Si sa i intérès pa tan pir ! Mi majine kant mèm, isi La rényon, épi dann l’oséan indien, épi partou na dé shoz intérésan pou amontré.

Alon pa konfonn « intérésan » avèk « fé l’intérésan ». Sa la pa lo mèm zafèr ! Pou kosa mi di sa ? Pars dann télé, mi oi tazantan i invite in moun inportan dann nout péizaz ; la pèrsone i vien, konm di lo kont la boush anfariné épi in tantine i poz ali késtyon dsi son famiy, dsi son pèrsonalité, dsi sak li èm épi sak li èm pa, koman li l’ariv la, koman li la pa ariv in n’ot koté mé lé rar antann ali parl dési son péi La Rényon. Lé rar antann la pèrsone dir pou kosa èl la pass in vi pou la défann son zidé. Mi an vé pa d’pèrsone an partikilyé, pars i di nana in règloman é la pèrsone la aksép sa… mé sa i donn azot, konm di lo kont, in dimansyon artifisyèl.

I paré sa lé a la mod. Demoun i vien amont zot figuir. Zot i vien réponn kalité késtyon, mi pans mèm pa in intérès azot pou vréman. La késtyon i vo la répons : i vo mèm pa son poi an rien ditou… Mé pétète, sak i pass pa dann télé, dizon lo kozman rant zot avan lo lémisyon é apré lo lémisyon lé pli intérésan ké sak i pass pars pou moin sa i vo pa lo voiyaz. I paré sa i apèl portré, in portré people..people péi si zot i suiv amoin bien.

NB-In kozman pou la rout : « Méfyé azot demoun na d’myèl dsi la lang » – in patoi mon la antann dann télé – Kosa sa i vé dir ? i vé dir na dmoun lé kapab fé prann demoun blan pou noir, makaroni pou la bouji avèk zot bone blag. Zot i tourn aou, i rotourn aou, i roul aou dan la farine. Kan ou i pans lé tro tar, ou lé pri konm zoizo dsi la kol. Majine azot in pé zot tour, fé travay zot koko, fé bouy in pé zot matyèr griz, zot nora dekoi pou dékor kozman nou la di an o la.


Kanalreunion.com