Oté

Pou alé kont lo sistèm néo-kolonyal !

Justin / 23 mars 2016

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, oplis i sava, oplis mi konpran pa bann rouj. Lontan té pli sinp : sak moin téi pans, moin té i pran lo kontrèr épi mi di ala kosa bann rouj i pans. Zordi lé pi parèy ditou. In légzanp ? Koméla zot i soutien lo kapitalis La Rényon. Ala ké zot i souplègn ké bann kapitalis déor la pran la plas sète isi ! Fransh vérité : zot lé pour sansa zot lé kont lo kapitalis ? Sak zot té i apèl lo sisèr d’san é lo bivèr la transpirasyon bann travayèr. Alor, mi èmré bien savoir. Mèm bann rouj pli rouj ké zot i konpran pi azot kan zot i défann in mézir an favèr bann kapitalis. Sèryèzman, si zot i koné pi kèl koté z’ot l’opinyon lé déviré, é-bin fèrm la boit. Sar pli préférab. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, si mi konpran bien sak bann filozof i apèl l’éspri d’finès la pa rankont aou dsi z’ot shomin.

D’abor figir aou, ni pans in l’antropriz, isi La Rényon sé l’ouvraz bann travayèr rényoné an promyé : kisoi bann z’ouvriyé, kisoi bann télknisien, kisoi ankor bann z’inzényèr. Donk kan in kapitalis déor i kapar sa, sé lo kouraj bann travayèr ké li kapar é pou la po d’patat la plipar di tan, po près arien ditou. Kosa bann travayèr i gingn an rotour ? Zéro kalbas la fimé gran-boi… Arzout èk sa, kan lo moun étranz i vé li fèrm lo boit épi bann travayèr i rès a-tèr… Ala pou kosa matant mi aprésyé pa lo l’invazyon bann kapitalis déor pars lo rézilta sé la déstriksyon nout prodiksyon intèryèr par lo sistèm néo-kolonyalis é si ni gingn alé kont sa, mi pans i fo ni sava . Donk rant bann kapitalis déor é bann kapitalis isi, pou mon par mi shoizi sèt isi-provi ké li konstrui é ké li détrui pa é ké la propriyété La Rényon i rès la propriyété La Rényon. Tok ! Pran sa pou ou !


Kanalreunion.com