Pou amontr lir épi ékrir, i fo pa dévir lo do avèk la kiltir lo marmay l’ékol !

Na dé-troi soir, moin la gard in fime dann télé. Sa lété intérésan, vèy pa. Dizon lo l’istoir in papa famiy pèshèr poisson apré fé l’édikasyon son zanfan névan. An partikilyé apré aprann ali koman té i viv pou l’ésansyèl : rash sonz ? Kal poisson ? Pèsh poisson ? Dizon lo papa té apré ède son marmay pou fé son « parkour inisyatik ».

Lété vréman intérésan solman la pa solman sa mi vé dir azot. Sak mi vé dir azot sé ké pou aprann in marmay lir épi ékrir dann la lang kréol, konm dan la lang fransé, konm dan d’ot lang, lo méyèr shomin sé lo shomin la kiltir lo marmay la gingn dann son famiy. Sa lé vré pou zanfan plantèr, pou zanfan péshèr, pou sak nana in famiy dann batiman, sak i viv dann in kalité l’anvironeman ké sé lé syène.

Moin lété dann in biro pou zéléksyon. Té in klass l’ékol é sak moin la vi la mank fé tonm amoin rède… Donk, l’avé in friz dsi lo bann sézon par an o lo tablo : printan, été, otone, ivèr é moi d’désanm l’avé in marmay antouré dann in l’ésharp apré tranblé avèk la fré. Mé z’ami, si lo rès lo program lété konmsa, mi pans pa bann marmay té i doi aprann bien l’ékol, pars pou moin son kiltir té kontrofé, lé éstropyé, lé asasiné.

Bann fabrikèr program, bann amontrèr lékol, bann minis épi lout sak i vé amontr dé shoz bann marmay, mi an priy azot alé rogard lo fime « lo zour la trap karang » épi d’ot ankor : rogard bien avèk lo zyé, la tète, avèk zot l’intélizans, z’ot kèr. Mi pans zot va konprann koman, malgré zot-mi vé bien kroir-, zot l’apré anpoizone l’éspri bann marmay l’ékol.